Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 212 Hüküm no: 191 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Fatma bt. Mehmed’in kendisini boşayan Çukadar Ömer Ağa’dan haklarını alarak zimmetini ibra etmesi Tatlîk ve mehrinin nısfı ahz ve nısfı mukābelesinde eşyâyı ahz ve ibrâ Mahmiye-i İslâmbol’da Koca Mustafa Paşa Câmi‘-i şerîfi kurbünde Bâzergân mahallesinde sâkine ve zâtı vech-i şer‘î üzere mu‘arrefe olan Fatıma bt. Mehmed nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-vesîka Çukadâr Ömer Ağa b. Rıdvan nâm kimesne mahzarında ikrâr ve takrîr-i kelâm edip mezbûr Ömer Ağa zevc-i dâhilim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan yirmi guruş mehr-i müeccelimin on guruşunu zevc-i mutallıkım mezbûr Ömer Ağa işbu meclis-i şer‘de bana def‘ ü teslîm ve ben dahi ber-vech-i muharrer yedinden ahz ü kabz edip bâkīsi olan on guruş ile nafaka-i iddet-i ma‘lûme-i mu‘ayyene ve meûnet-i süknâm içün bi’t-terâzî beynimizde ta‘yîn olunan beş guruş ki cem‘an on beş guruş hakkım mukābelesinde zevc-i mutallıkım mezbûr Ömer Ağa emlâkinden bir işleme yağlık ve bir işleme duhân kîsesi ve bir çevre ve iki bez gömlek ma‘a don ve bir çeki hatab ve yarım keyl pirinç ve sekiz vakıyye revgan-ı sâde ve yüz vakıyye kömürünü bana def‘ ü teslîm eyledikde ben dahi yedinden ahz ü kabz edip hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Ömer Ağa’nın zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 min-Saferi’l-hayr sene 1197 Şühûdü’l-hâl: Molla Ali b. Halil, Hacı Hasan b. Osman, Ali Ağa b. Mehmed, Mustafa b. Mustafa ve gayruhum.