Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 213 Hüküm no: 192 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serope v. Maroki’nin Koca Mustafa Paşa mahallesindeki arsa hissesini eniştesi Kuyumcu Toros’a satması Arsa mübâya‘ası Mahmiye-i İslâmbol’da Kumkapı kurbünde mütemekkin Serope v. Maroki nâm zimmî meclis-i şer‘-i şerîf-i enverde eniştesi işbu hâmilü’r-rakīm Kuyumcu Toros v. Asvador nâm zimmî muvâcehesinde ikrâr ve takrîr-i kelâm edip mahmiye-i mezbûrede Koca Mustafa Paşa mahallesinde vâki‘ bir tarafdan ba‘zan Mehmed Haşim Efendi zevcesi arsası ve ba‘zan Dülger Karabet zimmî arsası ve bir tarafdan Berber Agop zimmî arsası ve bir tarafdan tarîk-i âm ile mahdûd derûnunda bir bi’r-i mâ ve bodrum ve sarnıç ve sâir enkāz-ı ma‘lûmeyi hâvî bir bâb muhterik mülk menzil arsasının nısf-ı şâyi‘i müşterî-i merkūmun ve nısf-ı şâyi‘-i âharı benim yedimde mülküm olmağın ben arsa-i mezkûrede ber-vech-i muharrer mâlik olduğum nısf hissemi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Toros zimmîye iki yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz guruşun yüz guruşunu benim merkūm Toros zimmîye zimmetimde cihet-i karzdan deynim olan yüz guruşa takas ve mahsûb eylediğimde ol dahi mukāssa ve kabûl eyledikden sonra semen-i mezkûrun bâkīsi olan yüz guruşu dahi yedinden ahz ü kabz edip meblağ-ı mezkûrun gabn ve tağrîrine müte‘allika âmme-i de‘âvîden merkūm Toros zimmînin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm deyn-i mezkûr yüz guruşdan benim zimmetim berî ve arsa-i mezkûre müstakıllen merkūm Toros zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî-gurrei Saferi’l-hayr sene 1197 Şühûdü’l-hâl: el-Hâc İbrahim İbrikçi, es-Seyyid Hüseyin Leblebici Kethudâsı, Molla Ali b. Halil ve gayruhum. Yuvan v. Matos, Ohan v. Asvador, Kirkor v. Asvador, Serope v. Ohannes.