Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 216 Hüküm no: 171 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın küçük oğlu İbrahim Ethem’in gözüne ok atan diğer İbrahim Ethem’in babası Mehmed Salih ile anlaştıkları Ma‘rûz, Medîne-i Üsküdar’da Kazasker mahallesinde sâkin takrîben on üç yaşında İbrahim Edhem nâm mürâhıkın babası ve velîsi Asâkir-i muntazama-i Şâhâne yüzbaşılarından sâhib-i arzuhâl Ali Ağa b. Hasan nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde yine mahalle-i mezbûre sâkinlerinden derûn-ı arzuhâlde mezkûrü’l-ism takrîben on bir yaşında diğer İbrahim Edhem nâm sagīrin babası ve velîsi Mehmed Salih Ağa b. el-Hâc Mustafa muvâcehesinde mezbûr Mehmed Salih Ağa’nın velîsi olduğu işbu hâzır bi’l-meclis sagīr-i mezbûr diğer İbrahim Edhem velîsi olduğum kezâlik işbu hâzır bi’l-meclis merkūm İbrahim Edhem’i mezbûr Mehmed Salih Ağa’nın mahalle-i mezbûrede vâki‘ menziline götürüp menzil-i mezkûr havlusunda oğlum hâzır-ı mürâhık-ı mezbûrun sol gözüne ucu iğneli ok atıp cerh etmekle mûcib-i şer‘îsini bi’l-velâye taleb ederim deyü da‘vâya tasaddî etmiş idim. El-hâletü hâzihî mezbûr Mehmed Salih Ağa oğlum mürâhık-ı mezbûr için bana malından sekiz yüz guruş def‘ ü teslîm ve oğlum mürâhık-ı mezbûrun umûruna sarfla istihlâka emreylediğinde ben dahi bi’l-velâye ahz u kabz ve oğlum sagīr-i mezbûrun bi’l-velâye umûruna sarfla istihlâk etmemle bi’l-cümle hukūk-ı şer‘iyyeye müte‘allika da‘vâdan bi’l-asâle mezbûr Mehmed Salih Ağa ile oğlu sagīr-i hâzır-ı mezbûrun zimmetlerini, onlar dahi meblağ-ı müstehlek-i merkūmun istirdâdına müte‘allika da‘vâdan benimle oğlum mürâhık-ı hâzır-ı merkūmun zimmetlerini ibrâ ve iskāt ve her birimiz ber-vech-i muharrer âharın asâleten ve velâyeten ibrâsını kabûl edip bu vechile kat‘-ı nizâ‘ eyledik deyü ikrâr ve tasdîkleri huzûr-ı [âlîlerine i‘lâm olundu]. Fî 27 M sene [12]57.