Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 217 Hüküm no: 172 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazife Hatun’un, Ayşe Sıdıka aleyhindeki eşya ve alacak davasında anlaşma sağlanması Ma‘rûz, Sâhibe-i arzuhâl mu‘arrefetü’z-zât Hâce Nazife Hatun bt. Abdullah Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde medîne-i Üsküdar’da Ahmediye mahallesinde sâkine derûn-ı arzuhâlde mezkûretü’l-ism kezâlik zâtı mu‘arrefe Şerife Âişe Sıdıka bt. el-Hâc Hasan nâm hatun muvâcehesinde mezbûre Şerife Sıdıka Hatun zimmetinde bundan akdem malımdan ve yedimden ceste ceste iktirâz ve kabz ve umûruna sarfla istihlâk eylediği dokuz yüz guruş alacak hakkım olmağla meblağ-ı mezkûru hâlâ bana edâya ve malım olarak mezbûre Şerife Sıdıka Hatun’un yedine mukaddemâ li-ecli’l-hıfz îdâ‘ ve teslîm eylediğim altın üzerine masnû‘ elmaslıca bir çift zümrüd küpe ve altın üzerine masnû‘ yıldız resmi bir elmas iğne ve üç vakiyye penbe ve bir döşek şiltesi ve bir yüz yasdığı ve bir orta keçesi ve bir kapı perdesi aynen bana teslîme mezbûre Şerife Âişe Sıdıka Hatun’a tenbîh olunmak matlûbumdur deyü da‘vâ eylediğimde, ol dahi cevâbında zikirleri sebkat eden eşyâ-i muharrere-i mezkûreyi ber-vech-i muharrer ahzını ve bi-a‘yânihâ yedinde mevcûd olduğunu ikrâr ve mâ‘adâ dokuz yüz guruş karz müdde‘âmı inkârından mâ‘adâ benim senin zimmetinde mukaddemâ malımdan iktirâz ve kabz eylediğin yüz guruş ve bi-şartı’r-rücû‘ emrinle umûr-ı lâzıme-i ma‘lûmene kezâlik malımdan harc ü sarf eylediğim dört yüz on dört guruş ki cem‘an beş yüz on dört guruş alacak hakkım olmağla meblağ-ı mezkûru taleb ederim deyü inkârıma mukārin benden da‘vâ ve ol vechile beynimizde ba‘de vukū‘i’l-münâza‘a muslihûn tavassutuyla beynimizde tesviye ve tanzîm olunup ancak mezbûre Şerife Sıdıka Hatun zikirleri mürûr eden küpe ve iğne ve eşyâyı bi-a‘yânihâ bana teslîme ba‘de’t-ta‘ahhüd ben dahi ber-vech-i muharrer tasaddî eylediğim dokuz yüz guruş ve mezbûre Şerife Âişe Sıdıka Hatun dahi sâlifü’l-beyân iddi‘â eylediği beş yüz on dört guruş müdde‘âlarımızdan her birimiz âharımızla meccânen fâriğa olmamızla zikirleri mürûr eden küpe ve iğne ve eşyâdan mâ‘adâ bi’l-cümle husûs-ı mezkûre ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâ ve kâffe-i mütâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü mukırra-i mezbûre Hâce Nazife Hatun’u bi’l-cümle kelimât-ı meşrûhasında mezbûre Şerife Sıdıka Hatun’u tasdîk eylediği huzûr-ı [âlîlerine i‘lâm olundu]. Fî 10 S sene [12]57.