Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 222 Hüküm no: 206 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Fatma bt. Mustafa’nın kendisini boşayan kocası aleyhine açtığı davadan feragat etmesi Tatlîk ve ibrâ Mahmiye-i İslâmbol’da Mevlevîhâne Yenikapısı dâhilinde el-Hâc Evliyâ mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma bt. Mustafa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb el-Hâc Abdullah b. Ali nâm kimesne mahzarında ikrâr ve takrîr-i kelâm edip mezbûr el-Hâc Abdullah yirmi beş guruş mehr-i müeccel tesmiyesiyle zevc-i dâhilim iken târih-i kitâbdan dört buçuk sene mukaddem beni bâyinen tatlîk etmekle zimmetinde ma‘kūdun-aleyh olan mehr-i mezkûr yirmi beş guruş hakkımı zevc-i mutallıkım mezbûr el-Hâc Abdullah’dan bu esnâda taleb ve da‘vâya tesaddî etmişidim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğa olup mehr-i mezkûr yirmi beş guruşa ve bi’l-cümle hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr el-Hâc Abdullah’ın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 11 S sene 1197 Şühûdü’l-hâl: Müezzin Ali Efendi b. el-Hâc Yusuf, es-Seyyid Ahmed Efendi b. el-Hâc Salih, Molla Abdullah b. Hasan, Ali Ağa b. Ahmed, Mustafa b. Mustafa, Halil Çavuş Ağa b. Yakub, Molla Ali b. Halil ve gayruhum.