Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 223 Hüküm no: 207 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Nesibe bt. Mehmed’in bakmakta olduğu küçük kızı için, boşandığı kocasından nafaka alması Nafaka-i sagīre Mahmiye-i İslâmbol’da Koca Mustafa Paşa kurbünde Canbaziye mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Nesibe bt. Mehmed nâm hatun meclis-i şer‘-i şerîf-i enverde zevc-i muhâlı‘ı es-Seyyid Hasan b. es-Seyyid Ahmed nâm kimesne mahzarında takrîr-i kelâm ve ifâde-i merâm edip zevc-i muhâlı‘ım mezbûr es-Seyyid Hasan’ın firâşından hâsıla ve benden mütevellide ve bi-hakkı’l-hıdâne hacr u terbiyemde olan sadriye kızım Şerife Nefise nâm sagīrenin mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisve-bahâsı içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr es-Seyyid Hasan üzerine bi’t-terâzî târih-i kitâbdan küllü yevm üçer para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr es-Seyyid Hasan üzerine rücû‘a mezbûre Nesibe Hatun’a izin vermeğin mâ-vaka‘a bi’t-taleb. Fî 12 S sene 1197 Şühûdü’l-hâl: Mehmed Odabaşı b. Ahmed, Mehmed Beşe b. Ali, Molla Ali b. Halil, Mustafa b. Mustafa.