Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 224 Hüküm no: 208 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor mahallesinden Şerife Hibetullah’ın kocasından boşanması Muhâla‘a Mahmiye-i İslâmbol’da Mirâhor mahallesinde sâkine ve zâtı vech-i şer‘î üzere mu‘arrefe olan Şerife Hibetullah bt. Seyyid Veliyüddin nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb İbrahim b. Osman nâm kimesne mahzarında ikrâr ve takrîr-i kelâm edip mezbûr İbrahim zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr İbrahim ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i [de‘âvî] ve kâffe-i mutâlebâtdan ben zevcim mezbûr İbrahim’in zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 13 S sene 1197 Şühûdü’l-hâl: Mehmed Ağa b. Hasan Mumcu, Osman Beşe Harbeci, Mustafa b. Mustafa, Molla Ali b. Halil.