Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 224 Hüküm no: 209 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Hadice bt. Abdullah’ın kocası Ali Beşe b. Feyzullah’a mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da İbrahim Çavuş mahallesinde sâkine Hadice bt. Abdullah nâm hatun tarafından vech-i âtî üzere ikrâra vekîl olduğu zât-ı mezbûreyi ârifân Ali Çavuş Ağa b. Mustafa ve Müezzin Hafız İsmail b. Hasan nâm kimesneler şehâdetleriyle şer‘an sâbit olan mahalle-i mezbûre imâmı Hasan Efendi b. Mehmed meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci işbu bâ‘isü’l-vesîka Ali Beşe b. Feyzullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Hadice Hatun’un zevci mezbûr Ali Beşe zimmetinde ma‘kūdun-aleyh olan on beş guruş mehr-i müecceli ile yedinde mâlı ve mülkü olan on üç miskāl bir çift altın kuşak ve zümrüd taşlı bir çift altın küpesini hibe-i sahîha-i şer‘iye ile zevci mezbûr Ali Beşe’ye hibe ve temlik ve teslîm eylediğinde ol dahi meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâiresinden yün memlû iki minder ve yün memlû dört çatma yasdık ve dört yemeni yorgan bâ-çârşeb ve dört sahan ve iki tencere bâ-kapak ve bir çiçekli entari ve bir şali cübbesini dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Ali Beşe’ye yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden müvekkilem mezbûre Hadice Hatun zevci mezbûr Ali Beşe’nin zimmetini ibrâ-i âm ile ibrâ ve ıskāt eylediğinde ol dahi ibrâ-yı mezkûru kabûl eyledi, ba‘de’l-yevm mehr-i müeccel-i mezkûr yirmi guruşdan zevci mezbûr Ali Beşe’nin zimmeti berî ve zikr olunan bir çift altın kuşak ve bir çift altın küpe zevci mezbûr Ali Beşe’nin mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Hadice Hatun’un kat‘a alâka ve medhali kalmamışdır dedikde gıbbe. Fî 13 min-Saferi’l-hayr sene 1197 Şühûdü’l-hâl: Müezzin Hafız İsmail b. Hasan, Ali Çavuş Ağa b. Mustafa, Hacı Hasan b. Osman, Ali Beşe b. Halil, Osman Usta b. ( ), Seyyid Süleyman b. ( ), Molla Ali b. Halil, Salih b. Halil ve gayruhum.