Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 225 Hüküm no: 210 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kütahya kazasından olup Mimaracem mahallesinde misafir olan Hüseyin b. Ömer’in esamesini Ali b. Süleyman’a devretmesi Esâme kasr-ı yedi Vilâyet-i Anadolu’da Kütahya kazâsı mahallâtından Meydan mahallesi ahâlisinden olup mahmiye-i İslâmbol’da Mi‘mâr Acem mahallesinde müsâfiren sâkin Hüseyin b. Ömer nâm kimesne meclis-i şer‘-i şerîf-i enverde işbu bâ‘isü’l-kitâb Ali b. Süleyman nâm kimesne mahzarında ikrâr ve takrîr-i kelâm edip benim Silahdâr Ocağı’nda yüz otuz dördüncü bölükde Ömer İsmail Kütahya kırâet olunur yevmî on sekiz akçe esâmîmi bundan akdem kendi hüsn-i rızâ ve ihtiyârımla mezbûr Ali’ye ferâğ ve bi’l-külliye kasr-ı yed edip ibtidâ ta‘bîr olunur tezkiresini dahi mezbûr Ali yedine def‘ ü teslîm eylediğimde ol dahi bedel-i ferâğ olmak üzere bana mâlından teberru‘an yüz elli guruş def‘ ü teslîm ve ben dahi yedinden tamamen ahz ü kabz ve umûruma sarfla istihlâk eylediğimden sonra ben esâme-i mezkûra müte‘allika âmme-i de‘âvî ve kâffe-i mütâlebâtdan mezbûr Ali’nin zimmetini ibrâ-i âm ile ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr yüz elli guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î bi’t-taleb ketb olundu. Fî 15 min-Saferi’l-hayr sene 1197 Şühûdü’l-hâl: Osman Çavuş Ağa b. ( ), Mehmed Çavuş Ağa b. ( ), Ömer Çavuş Ağa b. ( ), Mustafa Efendi b. Ahmed Efendi, Salih b. Halil, Molla Mehmed b. Mustafa, Molla Ali b. Halil.