Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 226 Hüküm no: 211 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın küçük kızı Habibe’yi nafakasını karşılamak üzere boşadığı karısı Emine bt. Hasan’a vermesi Emriyle nafaka Mahmiye-i İslâmbol’da ( ) mahallesinde sâkin Mustafa b. Abdullah nâm kimesne meclis-i şer‘-i şerîf-i enverde zevce-i mutallakası olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emine bt. Hasan nâm hatun mahzarında takrîr-i kelâm ve bast-ı merâm edip bundan akdem mezbûre Emine Hatun ile zevciyet beynimizde kāime iken benim firâşımdan hâsıla ve mezbûre Emine Hatun’dan mütevellide sulbiye kızım Habibe nâm sagīre vâlidesi mezbûre Emine Hatun’un bi-hakkı’l-hıdâne hacr u terbiyesinde iken mezbûre Emine Hatun nefsini sagīre-i mezbûreye ecnebîye tezvîc ve hakk-ı hıdâne kendüden sâkıt olduğuna binâen ben kızım sagīre-i mezbûreyi vâlidesi mezbûre Emine Hatun’dan nez‘ murâd etmişidim. El-hâletü hâzihî kızım sagīre-i mezbûreyi vâlidesi mezbûre Emine Hatun’un yanında ke’l-evvel ibkā edip mezbûre Emine Hatun dahi mâlından sagīre-i mezbûrenin nafaka ve kisvesine târih-i kitâbdan küllü yevm onar akçe harc ü sarf edip ba‘dehû masrûfuyla bana rücû‘ etmek üzere mezbûre Emine Hatun’a emr eylediğimde ol dahi ber-vech-i muharrer sagīre-i mezbûreyi ahz ve ber-minvâl-i muharrer infâk ve iksâya ta‘ahhüd eyledi dediğini mezbûre Emine Hatun dahi tasdîk etmeğin mâ-vaka‘a bi’t-taleb. Fî 13 min-Saferi’l-hayr sene 1197 Şühûdü’l-hâl: Mehmed Emin b. Ali Ser-müezzin-i Murad Paşa, Molla Yusuf b. Ömer, Mustafa b. Mustafa, Molla Ali b. Halil.