Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 226 Hüküm no: 212 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Emine bt. İsmail’in bazı eşyalarını Rabia bt. Veliyüddin’e satması Eşyâ mübâya‘ası ve ahz ü kabz Mahmiye-i İslâmbol’da Koca Mustafa Paşa mahallesinde sâkine ve zâtı vech-i şer‘î üzere mu‘arrefe olan Emine bt. İsmail nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Rabia bt. Veliyüddin nâm hatun mahzarında ikrâr ve takrîr-i kelâm edip eşyâ-i memlûkemden bir beledî döşek ve bir yorgan bâ-çârşeb ve bir yemeni baş yasdığı ve çuka ferâce ve bir yaşmak ma‘a makrame ve iki sahan bâ-kapak ve dört tencere ve üç kapak ve bir şorba tası ve bir leğen ma‘a ibrik ve bir güğüm ve bir kadayıf tepsisi ve bir tâbemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Rabia Hatun’a on beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on guruş mütâlebesine ve mukaddemâ mezbûre Rabia Hatun’a bi-tarîki’l-emâne def‘ ü teslîm [31a] eylediğim yüz guruşu dahi mezbûre Rabia Hatun ceste ceste bana def‘ ü teslîm ve ben dahi yedinden tamamen ahz ü kabz ve umûruma sarfla istihlâk edip meblağ-ı mezbûr yüz guruşdan mezbûre Rabia Hatun yed ve kıbelinde bir akçe ve bir habbe bâkī kalmamağla bi’l-cümle hukūk-ı mezkûra ve sâire müte‘allika âmme-i de‘âvî ve kâffe-i mutâlebâtdan mezbûre Rabia Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre mezbûre Rabia Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 14 S sene 1197 Şühûdü’l-hâl: Ahmed Ağa b. Abdulkadir, es-Seyyid Mehmed b. Süleyman, Osman Ağa b. Mustafa, Süleyman b. ( ), Molla Ali b. Halil.