Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 227 Hüküm no: 213 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa-yı Atik mahallesinden Mustafa b. Ahmed’in esamesini Mehmed b. Osman’a devretmesi Esâme kasr-ı yedi Mahmiye-i İslâmbol’da Dikilitaş kurbünde Ali Paşa-yı Atik mahallesinde sâkin Mustafa b. el-Hâc Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-vesîka Mehmed b. Osman nâm kimesne mahzarında ikrâr ve takrîr-i kelâm edip benim Sipâh Ocağı’nda Birinci Bölük’de otuz akçe yevmiyeyi nâtık Salih Ahmed nâm ismiyle mutasarrıf olduğum esâmîmi bundan akdem kendi hüsn-i rızâ ve ihtiyârımla mezbûr Mehmed’e ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an iki yüz seksen guruş def‘ ü teslîm ve ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Mehmed’in zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr iki yüz seksen guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 15 S sene 1197 Şühûdü’l-hâl: İbrahim Efendi b. Halil, Ali Çavuş Ağa b. Mustafa, Hüseyin Ağa b. Osman, Ahmed b. Abdullah, Ebûbekir b. İsmail, Molla Ali b. Halil, Salih b. Halil, Mehmed b. Ali.