Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 228 Hüküm no: 214 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazer v. Kirkor ile Manas v. Asador’un diyet davasında sulh olmaları Dem [ü] diyetden ibrâ Vilâyet-i Anadolu’da Erzurum sancağında Tercan kazâsına tâbi‘ Ağatırı nâm karye ahâlisinden olup mahmiye-i İslâmbol’da Topkapısı dâhilinde Bâyezid Ağa mahallesinde kâin uncu değirmeninde mütemekkin iken bundan akdem hâlik olan Asvador nâm zimmînin babası ve hasran vârisi olduğu lede’ş-şer‘i’l-enver zâhir olan Kazer v. Kirkor nâm zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Manas v. Asador nâm zimmî muvâcehesinde bi’l-verâse ikrâr ve takrîr-i kelâm edip mesfûr Manas zimmî târih-i kitâbdan iki sene mukaddem oğlum mûrisim merkūm Asvador zimmî ile mahmiye-i mezbûrede Yenibahçe Çayırı nâm mevki‘de güreş edip oğlum mûrisim merkūm Asvador zimmî mesfûr Manas zimmînin güreşinin darbından nâşi sâhib-i firâş ve otuz gün mürûrunda müte’essiren hâlik olmuş idi deyü mûcib-i şer‘îsini mesfûr Manas zimmîden bu esnâda taleb ve da‘vâ eylediğimde ol dahi bi’l-külliye inkâr ve bu vechile beynimizde münâza‘ât-ı kesîre ve muhâsamât-ı şedîde cereyân etmiş idi. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni mesfûr Manas zimmî ile an-inkâr seksen guruş üzerine inşâ-i akd-i sulh eylediklerinde ol dahi sulh-ı mezkûru kabûl ve bedel-i sulh olan meblağ-ı mezbûr seksen guruşu mesfûr Manas zimmî bana def‘ ü teslîm eyledikde ben dahi yedinden tamamen ahz ü kabz edip oğlum mûrisim hâlik-i merkūmun diyetine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mesfûr Manas zimmînin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi bedel-i sulh nâmıyla bana medfû‘u olan meblağ-ı mezbûr seksen guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 15 S sene 1197 Şühûdü’l-hâl: Es-Seyyid Halil b. Yusuf, Ali Beşe b. Mehmed, Osman Beşe b. Halil, İsa Beşe b. ( ), Molla Ali b. Halil. Kabriyel v. Begos, Kazer v. Ohan, Garib v. Erimo, Mıgırdıç v. Oseb, Mardıros v. Hanyar, Artin v. Melkon ve gayruhum.