Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 228 Hüküm no: 215 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Şerife Zeliha Hatun’un kocasından boşanması Muhâla‘a Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Şerife Zeliha Hatun bt. Abdullah [nâm] hatun meclis-i şer‘-i hatîrde zevc-i dâhili işbu bâ‘isü’l-kitâb es-Seyyid Hayrullah Beşe b. Ahmed mahzarında ikrâr ve takrîr-i kelâm edip mezbûr es-Seyyid Hayrullah Beşe zevcim olup lâkin beynimizde hüsn-i mu‘âşeretimiz olmayıp hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Hayrullah Beşe ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Hayrullah’ın zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîk. Fî 15 min-Saferi’l-hayr sene 1197 Şühûdü’l-hâl: Ali Ağa b. Mehmed, Mustafa b. Mustafa, Salih b. Halil, Hacı Hasan b. Osman, Molla Ali b. Halil ve gayruhum.