Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 229 Hüküm no: 216 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın Kethuda mahallesinden Ayşe bt. Süleyman’ın kendisini boşayan İbrahim Çavuş’tan mehrini alarak zimmetini ibra etmesi Tatlîk Mahmiye-i İslâmbol’da Aydın Kethudâ mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Süleyman nâm hatun meclis-i şer‘-i hatîr-i lâzımü’t-tevkīrde zevc-i mutallıkı olup hâlâ Sipâh Ocağı kethudâsı bâ‘isü hâze’l-kitâb İbrahim Çavuş Ağa b. Abdullah tarafından vech-i âtî üzere vekîl olduğu es-Seyyid el-Hâc Mustafa b. Ali ve es-Seyyid el-Hâc Osman b. es-Seyyid Ahmed nâm kimesneler şehâdetleriyle şer‘an sâbit olan es-Seyyid Hasan Çavuş Ağa b. Mustafa mahzarında müvekkil-i mezbûr İbrahim Çavuş Ağa zevc-i dâhilim olduğu hâlde târih-i kitâbdan beş ay mukaddem beni bâyinen tatlîk etmekle zimmetinde ma‘kūdun-aleyh olan yedi bin akçe mehr-i müeccel hakkımı zevc-i mutallıkım müvekkil-i mezbûr İbrahim Çavuş Ağa işbu vekîl-i mezbûr es-Seyyid Hasan Çavuş Ağa yediyle meclis-i şer‘de bana def‘ ü teslîm eyledikde ben dahi ber-vech-i muharrer yedinden tamamen ahz ü kabz edip hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım müvekkil-i mezbûr İbrahim Çavuş Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 16 min-S sene 1197 Şühûdü’l-hâl: Es-Seyyid el-Hâc Mustafa b. Ali, es-Seyyid el-Hâc Osman b. es-Seyyid Ahmed, Osman Ağa b. Ömer, Hacı Hasan b. Osman, Molla Mehmed b. Ahmed, Mustafa b. Mustafa, Salih b. Halil, Molla Ali b. Halil.