Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 234 Hüküm no: 224 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Naile bt. Ahmed’in kocasından boşanması Şerîf’in, muhâla‘a Mahmiye-i İslâmbol’da Koca Mustafa Paşa kurbünde Canbaziye mahallesinde sâkine takrîben on iki yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Nâile bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka Şerîf Mehmed Efendi b. Şerîf Yar mahzarında ikrâr ve takrîr-i kelâm edip mezbûr Şerîf Mehmed Efendi zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan yüz otuz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve mâlımdan zevcim mezbûra medfû‘um olan elmas taşlı bir altın yüzük ve bir yâkut taşlı altın yüzük ve iki peştemâl ve iki havlu ve bir silecek ve bir çift na‘lin ve bir papuç ve bir şala kaplı kākum kürk ve iki entari ve bir şalvar ve üç değirmi baş yemenisi ve bir çuka ferâce dahi bedel-i hul‘ olmak üzere zevcim mezbûr Şerîf Mehmed Efendi ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mütâlebâtdan herbirimiz âharın zimmetini ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mezbûre Nâile Hatun’un babası mezbûr Ahmed b. el-Hâc Mustafa meclis-i şer‘de dâmâdı mezbûr Şerîf Mehmed Efendi mahzarında takrîr-i kelâm edip eğer kızım mezbûre Nâile Hatun ba‘de zamanın adem-i bulûğ iddi‘âsıyla zevci mezbûrdan huzûr-ı hâkimde mehr-i mezkûruna müte‘allika da‘vâ ve şer‘an nesne ahz eder ise mikdâr-ı me’hûzuna ben kefîl ve zâmin oldum dedikde mâ-vaka‘a bi’t-taleb. Fî 19 S sene 1197 Şühûdü’l-hâl: Es-Seyyid İsmail Efendi b. Ali İmâm-ı mahalle, Müezzin Molla Hüseyin b. Ali, es-Seyyid Abdulkadir b. es-Seyyid Hasan, el-Hâc İbrahim b. Mehmed, Ahmed Efendi b. Abdullah, Molla Ali b. Halil.