Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 236 Hüküm no: 226 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Ahmed b. Mehmed’in Şerife Nefise Hatun aleyhine açtığı alacak davasından men edilmesi Eşyâ mübâya‘asını isbât Mahmiye-i İslâmbol’da Koca Mustafa Paşa kurbünde Canbaziye mahallesinde sâkine Ahmed b. Mehmed nâm kimesne meclis-i şer‘-i şerîf-i enverde zâtı vech-i şer‘î üzere mu‘arrefe olan işbu bâ‘isetü’l-kitâb Şerife Nefise bt. el-Hâc Mustafa nâm hatun mahzarında üzerine da‘vâ ve takrîr-i kelâm edip benim mahmiye-i mezbûrede Suhte Sinan mahallesinde sâkine bundan akdem vefât eden Fatıma bt. Abdullah nâm hatun zimmetinde cihet-i deyn-i şer‘îden beş guruş alacak hakkım olmağla meblağ-ı mezbûr beş guruşu kable’l-ahz ve’l-istifâ mezbûre Fatıma Hatun fevt olup mecmû‘-ı terekesinden on miskāl bir çift altın bilezik ile on çatma yasdık yüzü ve bir orta keçesi ve kumaş ve yemeni iki yorgan ve bir baş yasdığı ve üç değirmi baş yemenisi ve yirmi yedi zirâ‘ iplik ve on yedi kelep penbe ve bir çift çedik papuç ve bir mor telli entari ve bir Hatâyî şalvar ve bir şali entari ve bir çiçekli entari ve bir çuka ferâce ve beş sahan bâ-kapak ve iki tencere bâ-kapak ve bir tâbe ve bir sini ve bir leğen ibrik ve bir güğüm ve bir hamam tası ve bir kahve ibriği ve bir şorba tası bâ-kapak ve bir lenger ve bir âbdest leğeni mezbûre Şerife Nefise Hatun bi’l-emâne ahz ü kabz etmekle meblağ-ı mezbûr beş guruşu müteveffât-ı mezbûrenin [33a] terekesinden olmak üzere mezbûre Şerife Nefise Hatun’dan taleb ederim dedikde gıbbe’s-suâl mezbûre Şerife Nefise Hatun dahi cevâbında müteveffât-ı mezbûrenin müdde‘î-i merkūma beş guruş deyni olduğunu ikrâr lâkin müteveffât-ı mezbûre Fatıma Hatun hâl-i hayatında bin yüz doksan beş senesi Saferi’l-hayrının on beşinci günü bana zikr olunan bir çift altın bileziğini hibe-i sahîha-i şer‘iye ile hibe ve temlik ve teslîm ve eşyâ-i muharrere-i mezkûreyi dahi bi-safkatin vâhidetin kırk guruşa bey‘ ve temlik ve teslîm ve semeni mütâlebesinden zimmetimi ibrâ ve ıskāt eyledikde ben dahi ber-vech-i muharrer ittihâb ve iştirâ ve temellük ve tesellüm ve kabz ve ibrâsını kabûl etmiş idim deyü def‘le mukābele edicek mezbûre Nefise Hatun’dan def‘-i meşrûhunu mübeyyin beyyine taleb olundukda udûl-ı ahrâr-ı ricâl-i Müslimînden mârrü’z-zikr Sohta Sinan mahallesi imâmı vekîli Hüseyin Efendi b. Salih ve sâlifü’z-zikr Canbaziye mahallesinde sâkin Molla Ali b. Halil nâm kimesneler li-ecli’l-istişhâd meclis-i şer‘a hâzırân olup istişhâd olunduklarında fi’l-hakīka mahmiye-i İslâmbol’da Suhte Sinan mahallesinde sâkine iken bundan akdem vefât eden Fatıma bt. Abdullah nâm hatun hâl-i hayatında bin yüz doksan beş senesi Saferi’l-hayrının on beşinci günü zikr olunan bir çift altın bileziğini hibe-i sahîha-i şer‘iye ile işbu mezbûre Şerife Nefise Hatun’a hibe ve temlik ve teslîm ve eşyâsından on çatma yasdık yüzü ve bir orta keçesi ve kumaş ve yemeni iki yorgan ve bir baş yasdığı ve üç değirmi baş yemenisi ve yirmi yedi zirâ‘ iplik ve on yedi kelep penbe ve bir çift çedik papuç ve bir mor telli entari ve bir Hatâyî şalvar ve bir şali entari ve bir çiçekli entari ve bir çuka ferâce ve beş sahan bâ-kapak ve iki tencere bâ-kapak ve bir tâbe ve bir sini ve bir leğen ibrik ve bir güğüm ve bir hamam tası ve bir kahve ibriği ve bir şorba tası bâ-kapak ve bir lenger ve bir âbdest leğenini dahi bi-safkatin vâhidetin mezbûre Şerife Nefise Hatun’a kırk guruşa bey‘ ve temlik ve teslîm ve semeni mütâlebesinden zimmetini ibrâ ve ıskāt eylediğinde ol dahi ber-vech-i muharrer ittihâb ve temellük ve tesellüm ve kabz ve ibrâsını kabûl edip ol-vechile zikr olunan bilezik târih-i mezbûrdan beri mezbûre Şerife Nefise Hatun’un mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olmuşdur, bizim bu husûs bu vech üzere ma‘lûmumuzdur deyü herbiri edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Ahmed meblağ-ı mezbûr beş guruş mütâlebesiyle mezbûre Şerife Nefise Hatun’a bî-vech mu‘ârazadan men‘ birle mâ-vaka‘a bi’t-taleb ketb olundu. Fî 12 S sene 1197 Şühûdü’l-hâl: Hüseyin Efendi b. Salih İmâm, Molla Ali b. Halil, Salih b. Halil, Mustafa b. Mustafa.