Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 218 Hüküm no: 174 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin, Mümin b. Süleyman aleyhindeki alacak iddiasını ispat edemediği Ma‘rûz, Sâhib-i arzuhâl es-Seyyid Mehmed b. Ali nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde isimleri mezkûr manav esnâfından Üsküdar’da sâkin es-Seyyid Mümin b. es-Seyyid Süleyman muvâcehesinde mezbûr es-Seyyid Mümin zimmetinde bin iki yüz elli altı senesi Muharremi’l-harâmının sekizinci günü İstanbul’da Yemiş İskelesi’nde vâki‘ dükkânımda malımdan ve yedimden iştirâ ve kabz eylediği beher vakiyyesi yüz doksan paraya olarak yüz dokuz vakiyye tulum peyniri semeninden beş yüz on yedi guruş otuz para ve beher kantarı elli ikişer guruşa olarak on kantar kuru üzüm semeninden beş yüz yirmi guruş ve sene-i mezkûre Cemâziyelûlâsı’nın onuncu günü İstanbul’da Esirpazarı’nda malımdan iktirâz ve kabz ve istihlâk eylediği beş yüz seksen sekiz guruş ki cem‘an bin altı yüz yirmi beş guruş otuz para alacak hakkımın on guruşunu mukaddemâ mezbûrdan kabz etmemle bâkīsi olan bin altı yüz on beş guruş otuz parayı mezbûr es-Seyyid Mümin’den hâlâ taleb ederim deyü da‘vâ etdikde, ol dahi cevâbında külliyen inkâr etmekle müdde‘î-i mezbûr ber-vech-i muharrer müdde‘âsını isbât için ikāme eylediği iki nefer şâhidler edâ-i şehâdet-i şer‘iyye edemediklerinden mâ‘adâ mazınne-i sû’ olmalarıyla tard olunup şâhid-i âhar ikāmesine kādir ve tahlîfe dahi tâlib olmamağın mûcebince müdde‘î-i mezbûr es-Seyyid Mehmed da‘vâ-yı mezkûresiyle merkūm es-Seyyid Mümin’e bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 15 S sene [12]57.