Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 240 Hüküm no: 231 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Keziban bt. Ramazan’ın kocasına mehri ile bir miktar parasını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Şehremîni kurbünde İskender Ağa mahallesinde sâkine Keziban bt. Ramazan nâm hatun tarafından ber-vech-i âtî ikrâra vekîl olduğu zât-ı mezbûreyi ârifân Mehmed Emin Ağa b. İbrahim ve Müezzin Molla Mustafa b. Halil nâm kimesneler şehâdetleriyle sâbit olan mahalle-i mezbûre imâmı Mehmed Efendi b. Halil meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci işbu bâ‘isü’l-vesîka Osman Beşe b. Derviş nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Keziban Hatun zevci mezbûr zimmetinde ma‘kūdun-aleyh olan otuz guruş mehr-i müecceli ile yedinde mâlı ve mülkü olan iki yüz doksan üç guruş nukūdunu hibe-i sahîha-i şer‘iye ile zevci mezbûr Osman Beşe’ye hibe ve temlik ve teslîm eylediğinde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâiresinden kıtık memlû altı beledî yasdık ve iki minder ve iki yemeni yorgan bâ-çârşeb ve iki beylik ve bir beledî döşek ve bir baş yasdığı ve bir şali entari ve bir çuka ferâce ve iki bez gömlek ve iki gömleklik bez ve bir silecek ve bir havlu ve bir peştemâl ve iki tencere ve dört sahan ve bir kazgan ve bir leğen ma‘a ibrik ve bir şamdan ve bir hamam tası ve bir tâbesini dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Osman Beşe’ye otuz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr otuz guruş mutâlebesinden müvekkilem mezbûre Keziban Hatun zevci mezbûr Osman Beşe’nin zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm mehr-i müeccel-i mezkûr otuz guruşdan zevci mezbûr Osman Beşe’nin zimmeti berî ve nakd-i merkūm iki yüz doksan üç guruş mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Keziban Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 21 S sene 1197 Şühûdü’l-hâl: Müezzin Molla Mustafa b. Halil, Mehmed Emin Ağa b. İbrahim, Bekçi İbrahim b. Hüseyin, Mahmud Odabaşı b. Hüseyin, Ali Beşe b. ( ), Molla Ali b. Halil, Molla Salih b. Halil.