Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 245 Hüküm no: 237 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Yuvan’ın varislerinin kendilerine miras kalan ev arsalarını Yorgi v. Nikola’ya satmaları Arsa mübâya‘ası Havâss-ı Refî‘a kazâsına muzâfe Makrihora nâm karyede mütemekkin iken bundan mukaddem hâlik olan Yanaki v. Yuvan nâm zimmînin zevce-i metrûkesi Saneki bt. Dimitri nâm Nasrâniye ile sulbî kebîr oğlu Foti nâm zimmî ve sulbiye kebîre kızları Veskino ve Demiti nâm Nasrâniyelere isâbeti lede’ş-şer‘i’l-enver zâhir oldukdan sonra merkūm Foti zimmî asâleten ve şahsı ta‘rîf-i şer‘î ile mu‘arrefe olan mersûme Saneki Nasrâniye kendi nefsinden asâleten ve kızları mersûmetân taraflarından vech-i âtî üzere vekîlleri olduğu şahs-ı mersûmetân-ı ârifân Nikola v. Yani ve Yamandi v. Sidri nâm zimmîler şehâdetleriyle sâbit olmağla mersûme Saneki Nasrâniye vekâleten meclis-i şer‘-i şerîf-i enverde işbu hâmilü’r-rakīm Yorgi v. Nikola nâm zimmî muvâcehesinde herbiri bi’l-asâle ve bi’l-vekâle ikrâr ve takrîr-i kelâm edip karye-i mezbûrede vâki‘ bir tarafdan Mehmed Efendi ve bazen Anaştaşya Nasrâniye menzilleri ve bir tarafdan Sirkeci Kostantin zimmî menzili ve iki tarafdan tarîk-i âm ile mahdûd bir bâb mülk menzil arsası mûrisimiz merkūm Yanaki zimmînin hayâtında ile’l-helâk yedinde mülkü olup ba‘de helâkihî bizimle müvekkiletân-ı mersûmetân Veskino ve Demiti Nasrâniyelere mevrûs olmağın biz arsa-i mahdûde-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Yorgi zimmîye otuz guruşa bi’l-asâle ve bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruşu merkūm Yorgi zimmî yedinden bi-kadri’l-hısas tamâmen ahz u kabz eyledik, ba‘de’l-yevm arsa-i mahdûde-i mezkûre merkūm Yorgi zimmînin mülk-i müşterâsı ve hakk-ı sırfı olup bizim ve müvekkiletân-ı mersûmetân Veskino ve Demiti Nasrâniyelerin kat‘an alâka ve medhalimiz kalmamışdır dediklerinde gıbbe’t-tasdîki’ş-şer‘î mâ vaka‘a. Fî 24 S. sene 1197 Şuhûdü’l-hâl: Mollâ Ali b. Halil, Salih b. Halil, Mustafa b. Mustafa, Nikola v. Yani, Yamandi v. Sidri ve gayruhüm.