Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 246 Hüküm no: 238 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in kocası Abdurrahim Efendi b. Hüseyin’den boşanması Muhâla‘a Medîne-i Hazret-i Ebî Eyyüb Ensârî -radiye anhü’l-bârî- mahallâtından Zal Mahmud Paşa mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Mehmed nâm hâtûn meclis-i şer‘-i şerîf-i enverde zevc-i dâhili işbu râfi‘ü’l-vesîka Abdurrahim Efendi b. Hüseyin mahzarında ikrâr ve takrîr-i kelâm edip mezbûr Abdurrahim Efendi zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kûdün-aleyh olan yirmi guruş mehr-i müeccelimin on üç guruşunu zevcim mezbûr yedinden ahz u kabz edip bâkīsi olan yedi guruş mehr-i müeccelim ile nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Abdurrahim ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i de‘âvî ve kâffe-i mutâlebâtdan ben zevcim mezbûr Abdurrahim Efendi’nin zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ vaka‘a bi’t-taleb. Fî 24 min-S. sene 1197 Şuhûdü’l-hâl: Kuzâtdan Mustafa Efendi b. Mehmed, Arab Mustafa b. Ahmed, Mollâ Ali b. Halil, Salih b. Halil ve gayruhüm.