Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 246 Hüküm no: 239 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Süleyman’ın Hasan b. Mehmed’e altın yüzüğünü hibe etmesi ve bazı eşyalarını da satması Eşyâ mübâya‘ası Mahmiyye-i İstanbul’da Aydın Kethüdâ mahallesinde sâkine Âişe bt. Süleyman nâm hâtûn tarafından ber-vech-i âtî ikrâra vekîl olduğu zât-ı mezbûreyi ârifân Müezzin Mollâ Ahmed b. Mahmud ve Mehmed Zühdü Efendi b. İbrahim nâm kimesneler şehâdetleriyle sâbit ve zâtı şâhidân-ı mezbûrân ta‘rîfleriyle mu‘arrefe olan Şerife Havva bt. es-Seyyid Mehmed nâm hâtûn meclis-i şer‘-i şerîf-i enverde işbu bâ‘isü’l-kitâb Hasan b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hâtûn yedinde mâlı olan üç dirhem bir altın mühür yüzüğünü hibe-i sahîha-i şer‘iyye ile mezbûr Hasan’a hibe ve temlîk ve teslîm ve eşyâ-i sâire-i memlûkesinden kıtık memlû sıragülü? üç köhne yasdık ve dört sahan ma‘a kapak ve bir leğen ma‘a ibrik ve bir hoşâb tasını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Hasan’a on guruşa bey‘ ve temlîk ve teslîm eylediğinde ol dahi ber-vech-i muharrer ittihâb ve iştirâ ve temellük ve tesellüm ve kabz u kabûl eyledikden sonra semeni olan meblağ-ı mezbûr on guruş mutâlebesinden dahi müvekkilem mezbûre Âişe Hâtûn mezbûr Hasan’ın zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm zikr olunan altın yüzük mezbûr Hasan’ın mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sırfı olup müvekkilem mezbûre Âişe Hâtûn’un kat‘â alâka ve medhali kalmamışdır dedikde gıbbe’t-tasdîki’ş-şer‘î mâ vaka‘a. Fî 24 min-Saferi’l-hayr sene 1197 Şuhûdü’l-hâl: İbrahim Efendi b. eş-Şeyh Osman İmâm-ı mahalle-i mezbûre, İmâmzâde Mehmed Zühdü Efendi b. İbrahim, Osman Ağa b. Himmet, Hacı Halil b. Abdullah, Koruk Müezzini Mollâ Mustafa b. ( ), Mustafa Beşe b. Ömer, Mehmed Ağa b. Abdullah ve gayruhüm.