Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 247 Hüküm no: 240 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’in kocası Ahmed b. Mehmed’den boşanması Muhâla‘a Mahmiyye-i İstanbul’da Aydın Kethüdâ mahallesinde sâkine takrîben on üç yaşında olup cüssesinin dahi bülûğa tahammülü olmağla rü’yet-i dem-i hayzla bülûğunu mu‘terife ve zâtı zeyl-i vesîkada muharrerü’l-esâmî müslimîn ta‘rîfleriyle mu‘arrefe olan Fâtıma bt. Mehmed nâm hâtûn meclis-i şer‘-i şerîf-i enverde zevc-i dâhili işbu bâ‘isü’l-kitâb Ahmed b. Mehmed nâm kimesne mahzarında ikrâr ve takrîr-i kelâm edip mezbûr Ahmed zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kûdün-aleyh olan on beş guruş mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mezbûrenin babası mezbûr Mehmed b. Mustafa meclis-i şer‘de dâmâdı mezbûr Ahmed mahzarında takrîr-i kelâm edip eğer kızım mezbûre ba‘de zamân adem-i bülûğ iddi‘âsıyla zevci mezbûrdan mehr-i mezkûruna müte‘allika huzûr-ı hâkimde da‘vâ ve şer‘an nesne ahz eder ise mikdâr-ı me’hûzuna ben kefîl ve zâmin oldum dedikde mâ vaka‘a. Fî 24 S. sene 1197 Şuhûdü’l-hâl: İbrahim Efendi b. eş-Şeyh Osman İmâm-ı mahalle-i mezbûre, Müezzin Mollâ Ahmed b. Mehmed, el-Hâc Hüseyin b. Ömer, Mustafa Ağa b. el-Hâc Halil, Mollâ Ali b. Halil.