Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 248 Hüküm no: 241 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Hasan’ın başka yere gidip dönmeyen kocası Ahmed b. Ali’den boşanmak istemesi İstihbâr-ı tatlîk Mahmiyye-i İstanbul’da Cafer Ağa mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Zeliha bt. Hasan nâm hâtûndan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i müslimînden mahalle-i mezbûrede sâkinler Mehmed Beşe b. Ahmed ve Hüseyin b. Mustafa nâm kimesneler zât-ı müstahbere-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Zeliha Hâtûn’un zevci gāib ani’l-beled Ahmed b. Ali nâm kimesne bin yüz doksan altı senesi Recebü’l-ferdinin evâilinde diyâr-ı âhara gider oldukda mahalle-i mezbûrede vâki‘ menzilinde eğer ben târîh-i mezbûrdan sene-i mezbûre Ramazânü’l-mübârekinin on beşinci gününe değin gelmez isem zevcem mezbûre Zeliha Hâtûn benden boş olsun diye şart ve ta‘lîk ve bizi işhâd ve târîh-i mezbûrdan beri mahmiyye-i mezbûreye geldiği ma‘lûmumuz değildir deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzan li’l-makāl bi’t-taleb. Fî 26 S. sene 1197 Şuhûdü’l-hâl: Mehmed Beşe b. Mehmed, Hüseyin b. Mustafa, Mollâ Ali b. Halil, Salih b. Halil.