Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 220 Hüküm no: 176 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçu Osman Ağa’nın, Dino v. Naum ve Yanako v. Dimo’da kefaletten dolayı olan alacağının tahsili Ma‘rûz Medîne-i Üsküdar’da Selman Ağa mahallesinde sâkin Yoğurtçu esnâfından Osman Ağa b. Ömer nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde yine esnâf-ı merkūmeden Dino v. Naum ve Yanako v. Dimo nâm zimmîler muvâcehelerinde yedimde olup işbu târîh-i i‘lâm-ı şehrînin on dördüncü günü târîhiyle müverrah ve hâlâ medîne-i İskender nâibi mevâlî-i i‘zâmdan fazîletlü Mehmed Emin Efendi’nin hatemini hâvî bir kıt‘a i‘lâm-ı şer‘î nâtık olduğu üzere benim Kaynarcı? esnâfından olup târîh-i i‘lâm-ı şehrînin on yedinci günü hâlik olan Andon v. İstonço zimmî zimmetinde semen-i mebî‘-i makbûzdan alacak hakkım olan bin sekiz yüz elli guruşa mersûm Andon zimminin sağlığında târîh-i i‘lâm-ı mezkûrdan otuz sekiz gün mukaddem mersûmân Dino ve Yanako zimmîler tarafından bi’l-emr ve’l-kabûl kefâlet-i mutlaka-i sahîha-i şer‘iyye ile ma‘an kefîl ve zâmin olmalarıyla ben meblağ-ı mezkûr bin sekiz yüz elli guruşu târîh-i i‘lâm-ı mezkûrdan medîne-i mezbûre mahkemesinde nâib-i mûmâ-ileyh huzûrunda kefâlet-i mahkiyelerine binâen mersûmân Dino ve Yanako zimmîlerden da‘vâ eylediğimde onlar dahi inkâr [48b] etmeleriyle ber-vech-i muharrer müdde‘âmı esnâf-ı merkūmûn Mustafa Ağa b. Hüseyin ve Ahmed Ağa b. Hüseyin nâm şâhideyn-i mu‘addileyn şehâdetleriyle mersûmân Dino ve Yanako zimmîler muvâcehelerinde vech-i şer‘î üzere isbât edip mûcebince meblağ-ı merkūmu bi-hükmi’l-kefâle bana ma‘an edâ ve teslîme mersûmân Dino ve Yanako zimmîlerden her birine tenbîh olunmuş idi. El-hâletü hâzihî meblağ-ı mahkûmün-bih-i mezkûru bana edâdan mersûmân Dino ve Yanako zimmîler imtinâ‘ etmeleriyle ol vechile meblağ-ı mahkûmün-bih-i mezkûr bin sekiz yüz elli guruş mersûmân Dino ve Yanako zimmîlerden tahsîl ve bana teslîm etdirilmek matlûbumdur deyü da‘vâ etdikde onlar dahi cevâblarında kaziyye minvâl-i muharrer üzere olduğunu bi-tamâmihâ tâyi‘an ikrâr ü i‘tirâf edip lâkin ben hakīkatde meblağ-ı mezkûra kefîl olmayıp şâhidân-ı merkūmân müdde‘î-i mezbûrun ahbâbından olmak takrîbiyle berây-ı hâtır şehâdet eylediklerine ve ol vechile yalan şâhidleri olduklarına binâen edâdan imtinâ‘ ederiz deyü takrîr-i meşrûhları üzere îrâd eyledikleri kelâmları cerh-i mücerred kābilinden olup mesmû‘a olmamağla alâ-mûcibi i‘tirâfihâ meblağ-ı mahkûmün-bih-i mezkûr bin sekiz yüz elli guruş mersûmân Dino ve Yanako zimmîlerden tahsîl ve müdde‘î-i merkūm Osman Ağa’ya teslîm etdirilmek iktizâ eylediği huzûr-ı âlîlerine i‘lâm olundu. El-emru li-men-lehü’l-emr. Fî 26 S sene [12]57.