Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 221 Hüküm no: 177 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naile Hatun’un vefat eden Emetullah bt. Mehmed’in varisi olduğunun tescili Ma‘rûz, Mübârek Rikâb-ı kamer-tâb-ı hüsrevâneye takdîm-i arzuhâl eden medîne-i Üsküdar sâkinelerinden mu‘arrefetü’z-zât Âişe Hatun bt. İsmail tarafından husûs-ı âti’l-beyânda vekîl-i müseccel-i şer‘îsi es-Seyyid el-Hâc Hafız Mehmed Efendi b. Süleyman şifâhen sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde derûn-ı arzuhâlde mezkûretü’l-ism olup medîne-i mezbûrede Atîk Vâlide Sultan Câmi‘-i Şerîfi Vakfı hudûdu dâhilinde Arakiyeci el-Hâc Cafer mahallesinde sâkine iken bundan akdem fevt olan gayr-ı reşîde Emetullah Hatun bt. Mehmed’in li-ebeveyn ammetesi kızı ve zî-rahm cihetinden hasran vârisesi olmağla verâsetine bir kıt‘a i‘lâm-ı şer‘î nâtık olduğu üzere hükm-i şer‘î lâhık olup ol vechile tereke-i müteveffât-ı mezbûreye bi’l-verâse vâzı‘atü’l-yed olan kezâlik derûn-ı arzuhâlde ismi mezkûre zâtı mu‘arrefe Naile Hatun bt. Osman muvâcehesinde müvekkilem mezbûre Âişe Hatun müteveffât-ı merkūme Emetullah Hatun’un li-ebeveyn ammi Ahmed’in kızı Emine Hatun’un sadriye kızı ve ol vechile müteveffât-ı mezbûreye zî-rahm cihetinden hasran vârise olup merkūme Naile Hatun müteveffât-ı mezbûrenin vârisesi olmayıp beslemesi ve ahretliği iken mezbûre Naile Hatun’un yedinde olup sene-i sâbıkā Zilka‘deti’ş-şerîfesi’nin beşinci günü târîhiyle müverrah bir kıt‘a i‘lâm-ı şer‘î nâtık olduğu üzere mezbûre Naile Hatun bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i müşârün-ileyhde akdolunan meclis-i şer‘de müteveffât-ı mezbûre Emine [Emetullah] Hatun’un hîn-i fevtinde zâhirde vâris-i ma‘rûfu olmayıp terekesi cânib-i beytülmâla âid olmak zu‘muyla hudûd-ı merkūme dâhilinde bilâ-vâris-i ma‘rûf fevt olanların beytülmâla âid olan terekelerini cânib-i vakf-ı mezkûr için kabza memûr olmağla tereke-i müteveffât-ı mezbûreye bi’l-emâne vâzı‘u’l-yed ve husûmeti re’y olunan vakf-ı müşârün-ileyhânın kāimmakām-ı mütevellîsi hâlâ Evkāf-ı hümâyûn Nâzırı ecille-i ricâl-i saltanat-ı seniyyeden atûfetlü Numan Mahir Beyefendi tarafından vekîl-i müseccel-i şer‘îsi câbî-i vakıf Hüseyin Ağa b. Musa muvâcehesinde müvekkilem mezbûre Âişe Hatun hâzıra olduğu hâlde merkūme Naile Hatun müteveffât-ı mezbûrenin ber-vech-i muharrer li-ebeveyn ammetesi kızı olup müteveffât-ı mezbûreye müvekkilem mezbûreden akreb olduğundan mîrâsa evlâd-ı verâsete müvekkilem merkūmdan mukaddem ve ol vechile müteveffât-ı mezbûreye zî-rahm cihetinden hasran vârise olmağla müvekkil-i nâzır-ı mûmâ-ileyhin bi’l-emâne vâzı‘u’l-yed olduğu tereke-i müteveffât-ı mezbûreyi vekîl-i câbî-i merkūm ile müvekkilim mezbûrenin inkârlarına mukārin da‘vâ ve müdde‘âsını iki nefer şâhideyn şehâdetleriyle vech-i şer‘î üzere isbât ve şâhidân-ı merkūmân ba‘de’t-ta‘dîl ve’t-tezkiye şehâdetleri makbûle [49a] olup mucebince merkūme Naile Hatun’un verâsetine hükm-i şer‘î lâhık oldukdan sonra nâzır-ı mûmâ-ileyhin bi’l-emâne vâzı‘u’l-yed olduğu tereke-i müteveffât-ı mezbûreyi bi’l-verâse kabz etmiş idi. El-hâletü hâzihî mezbûre Naile Hatun mutlakan müteveffât-ı mezbûrenin vârisesi olmayıp ve şâhidân-ı mezbûrân yalan şâhidleri olmağla merkūme Naile Hatun’un ber-vech-i muharrer verâset müdde‘âsı tekrâr istimâ‘ olunması müvekkilem merkūme Âişe Hatun’un matlûbudur deyü vekîl-i mezbûre es-Seyyid el-Hâc Mehmed Efendi’nin bi’l-vekâle takrîr-i meşrûhu üzere îrâd eylediği kelâmı meşrû‘a ve iltifâta şâyân olmadığı kendüye tefhîm ve bi’l-vekâle da‘vâ-yı mezkûresiyle merkūme Emetullah [Naile] Hatun’a bî-vech-i şer‘î mu‘ârazadan men‘ olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr. Fî 6 S sene [12]57.