Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 256 Hüküm no: 253 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Ebubekir Ağa’nın kiracısı olduğu Osman Efendi’nin yanan dükkânını yeniden yaptırması Dükkân îcâr ve istîcârı Mahmiye-i İslâmbol’da Mi‘mâr Acem mahallesinde sâkin Ebûbekir Ağa b. Ali nâm kimesne meclis-i şer‘-i şerîf-i enverde fahrü’l-emâsil ve’l-akrân bâ‘isü hâze’l-kitâbi’l-müstetâb Mühürdâr el-Hâc Osman Efendi b. Ahmed mahzarında ikrâr ve takrîr-i kelâm edip mezbûr el-Hâc Osman Efendi’nin taht-ı tasarrufunda olup mahmiye-i mezbûrede Davudpaşa mahallesinde vâki‘ ma‘lûmü’l-hudûd üç kepenk bir bâb kahve dükkânında ben mukaddemâ beher şehr altmışar para ücret ile müsteciri olduğum hâlde dükkân-ı mezkûr bundan akdem vâki‘ olan harîk-i kebîr’de muhterik olup dükkân-ı mezkûrun müceddeden binâsı içün mezbûr Osman Efendi bana mâlından yüz guruş def‘ ve teslîm eylediğinden sonra ben dahi meblağ-ı mezbûr yüz guruşdan mâ‘adâ emriyle mâlımdan dükkân-ı mezkûrun binâsına yüz elli guruş dahi harc ü sarf etmemle meblağ-ı masrûf-ı mezkûr yüz elli guruşu ben bu esnâda mezbûr el-Hâc Osman Efendi’den taleb ve da‘vâya tesaddî etmişidim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğ olup meblağ-ı mezbûr yüz elli guruşa ve sâire müte‘allika âmme-i de‘âvî ve kâffe-i mütâlebâtdan mezbûr el-Hâc Osman Efendi’nin zimmetini ibrâ ve ıskāt eylediğimde ol dahi ibrâmı kabûl eyledikden sonra mezbûr el-Hâc Osman Efendi dükkân-ı mezkûru târih-i kitâbdan beher mâh altmışar para ücret tesmiyesiyle bana îcâr ve teslîm ve ben dahi ber-vech-i muharrer istîcâr ve tesellüm ve kabûl ve ücret-i müsemmâ-yı mezkûr altmışar parayı beher mâh tamamında kendüye edâ ve teslîme ta‘ahhüd eyledim dedikde gıbbe’t-tasdîki’ş-şer‘î mâ-vaka‘a. Fî 29 S sene 1197 Şühûdü’l-hâl: Mehmed Salim Efendi b. Hüseyin Efendi, Hüseyin Efendi b. İbrahim Efendi, Numan Efendi b. Süleyman, Molla Ali b. Halil, Salih b. Halil, Tâhir b. Abdullah, el-Hâc Hasan b. Osman ve gayruhum.