Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 257 Hüküm no: 254 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İlyas mahallesinden Şerife Ayşe Hatun’un kendisini boşayan kocasından haklarını tahsil etmesi Tatlîk Mahmiye-i İslâmbol’da Kasab İlyas mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Âişe Hatun bt. İbrahim meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-vesîka Ömer b. Hüseyin nâm kimesne mahzarında ikrâr-ı tam ve takrîr-i kelâm edip mezbûr Ömer zevc-i dâhilim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan yirmi altı guruş mehr-i müeccelim ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan dört guruş ki cem‘an otuz guruş hakkımı zevc-i mutallıkım mezbûr Ömer işbu meclis-i şer‘de bana def‘ ü teslîm eyledikde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mütâlebâtdan ben zevc-i mutallıkım mezbûr Ömer’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 29 min-S sene 1197 Şühûdü’l-hâl: Alemdâr Musli b. Ömer, Hamza Beşe b. Mehmed, Seyyid Mehmed b. Hacı İsmail, Ömer Beşe b. Mustafa, Molla Ali b. Halil ve gayruhum.