Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 258 Hüküm no: 255 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyas mahallesinden Hediyetullah bt. Osman’ın bülûğ çağına girdiğinin tescili Rüşdünü ihbâr Mahmiye-i İslâmbol hısnı ebvâbından Yedikule Kapısı dâhilinde el-Hâc İlyas mahallesinde sâkine takrîben on iki yaşında olup cüssesinin dahi bulûğa tahammülü olmağla rü’yet-i dem-i hayzla bulûğu[nu] mu‘terife ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu râfi‘atü’l-vesîka Hediyetullah bt. Osman nâm bikr-i bâliğa meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip ben âkıle ve bâliğa ve bi-nefsihâ umûrumu rü’yete kādire olmamla takrîrim tahrîr ve kıbel-i şer‘den hüccet-i şer‘iye olunup yedime i‘tâ olunmak matlûbumdur dedikde hakīkat-i hâl mukırre-i mezbûre Hediyetullah’ın takrîr-i meşrûhası üzere olduğu zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mütebeyyin olmağın vâki‘ü’l-hâl hıfzen li’l-makāl bi’t-taleb ketb olundu. Fî-gurrei şehri Rebî‘ülevvel sene 1197 Şühûdü’l-hâl: İmâm Mehmed Emin Efendi b. el-Hâc Osman, Bostânî Abdüllatif Beşe b. İsmail, Mustafa Beşe b. Mehmed, Kirişçi Emin Ağa b. Ali, Müezzin Molla Sadık b. Feyzullah, es-Seyyid Hüseyin Ağa b. es-Seyyid Hasan, Said Ağa b. el-Hâc Ali, Mustafa Efendi b. el-Hâc İsmail, Ahmed Ağa b. Mehmed, Seyyid Ömer b. Ali, Debbâğ Halil Ağa b. el-Hâc İbrahim ve gayruhum.