Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 222 Hüküm no: 178 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayvacık kazası Merkepli köyünden Halil b. Hüseyin’in Voyvoda Mehmed Lütfullah Ağa aleyhindeki alacak iddiasının reddedilmesi Ma‘rûz Hüdâvendigâr sancağında vâki‘ Ayvacık kazâsına tâbi‘ Merkebli karyesi ahâlîsinden derûn-ı arzuhâlde ismi mezkûr Halil b. Hüseyin nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i şerîf-i enverde mukaddemâ kazâ-i mezbûre voyvodası sâhib-i arzuhâl Mehmed Lütfullah Ağa b. Mehmed muvâcehesinde mezbûr Mehmed Lütfullah Ağa bin iki yüz elli senesi hilâlinde kazâ-i mezbûrda voyvoda olduğu hînde malımdan bi-gayr-ı hakkın yedi yüz elli guruşu ahzetmekle meblağ-ı mezkûru mezbûr Lütfullah Ağa’dan istirdâd ederim deyü da‘vâ etdikde ol dahi cevâbında inkârından mâ‘adâ bin iki yüz kırk sekiz senesinden berü sâlifü’z-zikr Ayvacık kazâsı Voyvodalığı uhde [ve] iltizâmımda iken işbu târîhden iki buçuk sene mukaddem bi’l-îcâb voyvodalık-ı mezkûrdan azl ü infisâlim esnâsında ahâlî-i kazâ vekîlleri Der-aliyye’ye gelip kâffe-i hukūkumuzu muhâsebeleri bi’d-defa‘ât zecriye muhassılı sâbık müteveffâ Mehmed Bey muvâcehesinde ve ba‘dehu Bâb-ı âlî Dâr-ı şûrâ-yı meclis-i âliyesinde bi’t-tav‘ ve’r-rızâ yegān yegān lede’r-rü’ye ahâlî-i merkūmûndan hiçbir ferdin kat‘â nizâ‘ ve husûmete dâir benimle bir işi kalmamış olduğundan meclis-i müşârün-ileyhde ahâlî-i merkūmûna cevâb verilmesi husûsunu tezekkür ve tensîb olunarak keyfiyet mübârek hâk-ı pây-ı hümâyûn-ı hazret-i şâhâneden lede’l-istîzân iktizâ-yı icrâsı husûsuna irâde-i seniyye-i mülûkâne ta‘allukuyla emirnâme-i sânî verilerek ahâlî-i merkūmûn mahallerine i‘âde ve i‘zâm olundukdan sonra yedimde olan işbu çend kıt‘a senedât ve Başmuhâsebe’den verilmiş olan mümzâ defâtir mantûklarınca biz merkūm Halil ve bi’l-cümle ahâlî-i kazâ mahâllinde ma‘rifet-i şer‘ ve kazâ-i mezbûr muhassılı ve a‘zâ-yı meclis muvâcehelerinde Tanzîmât-ı hayriye usûl-i mehâsin-şümûlü îcâbınca tekrâr muhâsebelerimizi lede’r-rü’ye ahâlî-i merkūmdan zimmetlerinde zuhûr edip mukırr u mu‘terif oldukları düyûnlarını başka başka îzâhen defter-i mümzâya rabt ile her bir karye ahâlîleri bi’t-tav‘ ve’r-rızâ cemî‘ hukūk-ı şer‘iyyeden benim zimmetimi kabûlüme mukārin ibrâ ve iskāt etmeleriyle ol vechile merkūm Halil ahâlî-i merkūmûndan hiçbir kimesnenin hukūk-ı şer‘iyyeye dâir senden bir matlûbları dahi kalmamışdır deyü sûret-i def‘de eylediği ibrâ müdde‘âsı ve bi’l-cümle husûs-ı mezkûru merkūm Halil tasdîk etmeğin mûcebince müdde‘î-i mezbûr Halil da‘vâ-yı mezkûresiyle mezbûr Lütfullah Ağa’ya bî-vech-i şer‘î mu‘ârazadan ba‘de’l-men‘ merkūm Lütfullah Ağa kazâ-i mezbûr ahâlîsinden ba‘zı garaz ve nefsâniyetlerine mebnî kendüden bî-vech-i şer‘î da‘vâları olup şer‘an bî-vech müdde‘â olunduğu tebyîn eylediği hâlde ahâlî-i kazâ-i merkūmûnun bu makūle da‘vâları istimâ‘ olunmamak için Dîvân-ı hümâyûn tarafından bâlâsı tuğrâ-yı garrâ-yı cihân-bânî ile müzeyyen bir kıt‘a fermân-ı âlîşân sudûrunu istid‘â etmekle ol bâbda merkūm Lütfullah Ağa’nın istid‘âsına müsâ‘ade buyurulmak re’y-i âsafânelerine menût mevâddan idüğü huzûr-ı [âlîlerine i‘lâm olundu]. Fî 28 S sene 1223.