Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 261 Hüküm no: 261 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Esad Molla’nın arsasının bir kısmını Hafız İsmail’e satması Mübâya‘a-i menzil Medîne-i Üsküdar’da ( ) mahallesinde sâkin es-Seyyid Mehmed Esad Molla b. es-Seyyid Ahmed Efendi meclis-i şer‘-i şerîf-i enverde işbu bâ‘isü’l-kitâb Hafız İsmail b. Hafız Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülk ve hakkım olup mahmiye-i İslâmbol’da el-Hâc Bayram Kaftânî mahallesinde vâki‘ bir tarafdan Muslihiddin Efendi arsası ve bir tarafdan el-Hâc Hasan veresesi arsası ve bir tarafdan benim tasarrufumda olan vakıf arsa ve bir tarafdan tarîk-i âm ile mahdûd derûnunda bir harâb hamam ve sâir enkāz-ı ma‘lûmeyi hâvî terbî‘an iki yüz otuz zirâ‘ bir bâb menzil arsasının zikr olunan Muslihiddin Efendi tarafından yüz elli yedi buçuk zirâ‘ mahâllini ifrâz ve alâmât-ı fâsıla vaz‘ıyla mümtâz edip zikr olunan yüz elli yedi buçuk zirâ‘ müfrez arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hafız İsmail’e üç yüz on beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz on beş guruşu mezbûr Hafız İsmail yedinden tamamen ahz ü kabz eyledim, ba‘de’l-yevm zikr olunan arsa-i müfreze mezbûr Hafız İsmail’in mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 3 Ra sene 119 Şühûdü’l-hâl: Es-Seyyid el-Hâc Hasan b. Ahmed, el-Hâc İbrahim b. Ahmed, es-Seyyid Mehmed b. Ali, el-Hâc Feyzullah b. Salih, Molla Ali b. Halil, Mustafa b. Mustafa.