Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 262 Hüküm no: 262 Orijinal metin no: [37b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ahmed Efendi’nin arsasını İbrahim Efendi’ye satması Arsa mübâya‘ası Mahmiye-i İslâmbol’da Ali Fakih mahallesinde sâkin ve mukābele-i süvârî şâkirdlerinden es-Seyyid Ahmed Efendi b. el-Hâc Hüseyin meclis-i şer‘-i hatîr-i lâzımü’t-tevkīrde Silahdâr Kalemi hulefâlarından fahrü’l-emâsil ve’l-akrân bâ‘isü hâze’l-kitâbi’l-müstetâb el-Hâc İbrahim Efendi b. el-Hâc Ramazan tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Osman Çavuş Ağa b. Mustafa mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Koruk Mahmud mahallesinde kâin iki tarafdan Mehmed Emin Ağa arsası ve iki tarafdan tarîk-i âm ile mahdûd terbî‘an iki yüz yetmiş zirâ‘ arsa derûnunda bir bi’r-i mâ ve sâir enkāz-ı mevcûde-i ma‘lûmeyi hâvî dâhiliye [38a] ta‘bîr olunan bir bâb muhterik mülk menzil arsamı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkil-i mûmâ-ileyh el-Hâc İbrahim Efendi’ye iki yüz elli guruşa bey‘ ve temlik ve teslîm ve yine hudûd-ı mezkûr dâhilinde merhûm Hüsameddin Vakfı’ndan beher şehr on akçe icârelü hâriciye ta‘bîr olunur ma‘lûmu’z-zirâ‘ vakıf menzil arsamı dahi bâ-ma‘rifet-i mütevellî yine müvekkil-i mûmâ-ileyh el-Hâc İbrahim Efendi’ye yüz elli guruş bedel mukābelesinde ferâğ-ı mu‘teber-i kat‘î ile ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i mebî‘-i mezkûr iki yüz elli guruş ile bedel-i ferâğ-ı merkūm yüz elli guruş ki cem‘an dört yüz guruşu müvekkil-i mûmâ-ileyh el-Hâc İbrahim Efendi yedinden tamamen ahz ü kabz eyledim, ba‘de’l-yevm arsa-i mahdûde-i mezkûrenin dâhiliye ta‘bîr olunan mahâlli müvekkil-i mûmâ-ileyh el-Hâc İbrahim Efendi’nin mülk-i müşterâsı ve hakk-ı sarfı ve hâriciye ta‘bîr olunan mahâlli dahi bâ-ma‘rifet-i mütevellî dâhil-i havza-i tasarrufu olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 4 min-Ra sene 1197 Şühûdü’l-hâl: Abdullah Efendi b. Abdullah, el-Hâc Ali Çavuş Ağa b. Mehmed, İbrahim Çavuş Ağa b. İbrahim, Câbî es-Seyyid Osman Efendi b. Ali, Mehmed Efendi b. Mehmed, Ali Çavuş Ağa b. Mustafa, Halil Çavuş Ağa b. Halil, Hüseyin Çavuş Ağa b. el-Hâc Mehmed, Molla Ali b. Halil, Salih b. Halil ve gayruhum.