Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 263 Hüküm no: 263 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Saliha bt. Mustafa’nın kocası Mehmed Beşe’den boşanması Muhâla‘a Mahmiye-i İslâmbol’da Koca Mustafa Paşa mahallesinde sâkine ve zâtı vech-i şer‘î üzere mu‘arrefe olan Saliha bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-vesîka Mehmed Beşe b. Ahmed nâm kimesne mahzarında ikrâr ve takrîr-i kelâm edip mezbûr Mehmed Beşe zevcim olup lâkin beynimizde hüsn-i mu‘âşeretimiz olmamağla üç def‘a akidde müsemmâ zimmetinde mütekarrer ve ma‘kūdun-aleyh olan kırk guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum olan cihet-i karzdan yirmi guruşdan mâ‘adâ hukūk-ı sâireye müte‘allika âmme-i de‘âvîden ben zevcim mezbûr Mehmed’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 4 Ra sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Ali Ağa b. Mehmed.