Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 264 Hüküm no: 264 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden İbrahim b. Mustafa tarafından boşanmış olan Zeyneb bt. Abdullah’ın başkasıyla evlenmesine izin verilmesi Zât-ı hayz olup üç def‘ada yemîn ile tasdîk Mahmiye-i İslâmbol’da Cafer Ağa mahallesinde sâkin İbrahim b. Mustafa nâm kimesnenin zevce-i muhteli‘ası ve yevm-i hul‘dan târih-i kitâba gelince altmış iki gün mürûr eylediği zevc-i muhâlı‘ı mezbûrun yedinde olan bir kıt‘a muhâla‘a hücceti mantûkunca zâhir olan mu‘arrefetü’z-zât işbu bâ‘isetü’l-kitâb Zeyneb bt. Abdullah nâm hatun meclis-i şer‘-i şerîf-i enverde takrîr-i kelâm ve bast-ı merâm edip ben zât-ı hayz olmamla târih-i kitâba gelince altmış iki gün içinde tuhr-ı kâmil-i mütehallil ile üç def‘a hayz-ı kevâmil görüp iddetim münkaziye olmağla nefsimi âhara tezvîc bana helâl oldu deyü eylediği da‘vâsında sâdıka olup ve kütüb-i fıkhiyyede “ve ekallü’l-müddeti elletî tusaddaku’l-hurre fî-inkızâi’l-iddeti şehrâni” mesele-i müftâ-bihâsı üzere mezbûre Zeyneb Hatun mubtıla ve kâzibe olmadığına hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri yemîn teklif edildikde ol dahi alâ-vefkı’l-mesûl half billâhi’l-aliyyi’l-a‘lâ etmekle mezbûre Zeyneb Hatun nefsini dilediği kimesneye akd ve tezvîce kıbel-i şer‘den izin verilmeğin mâ-vaka‘a bi’t-taleb. Fî 4 Ra sene 1197 Şühûdü’l-hâl: Molla Ali b. Halil, Salih b. Halil, Molla Mehmed b. Mustafa.