Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 264 Hüküm no: 265 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Emine bt. İbrahim’in kendisini boşayan kocası ile mehir alacacağı konusunda sulh olması Tatlîk Mahmiye-i İslâmbol’da Koca Mustafa Paşa mahallesinde sâkine ve zâtı vech-i şer‘î üzere mu‘arrefe olan Emine bt. İbrahim nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb es-Seyyid Ahmed b. İlyas mahzarında ikrâr ve takrîr-i kelâm edip mezbûr es-Seyyid Ahmed zevc-i dâhilim olduğu hâlde târih-i kitâbdan seksen bir gün mukaddem beni tatlîk etmekle zimmetinde ma‘kūdun-aleyh olan iki def‘a akidde müsemmâ otuz üç guruş mehr-i müeccelimi zevc-i mutallıkım mezbûrdan bu esnâda taleb ve da‘vâya tesaddî etmişidim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni zevc-i mutallıkım mezbûr ile beş guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr beş guruşu zevc-i mutallıkım mezbûr es-Seyyid Ahmed işbu meclis-i şer‘de bana def‘ ü teslîm eyledikde ben dahi tamamen ahz ü kabz edip mâ‘adâ yirmi sekiz guruşa ve hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr es-Seyyid Ahmed’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 11 Ra sene 1197 Şühûdü’l-hâl: Mustafa Efendi b. Mehmed, Ömer b. Mehmed, Molla Ali b. Halil, Mustafa b. Mustafa ve gayruhum.