Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 265 Hüküm no: 266 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğde kazası Dilmason köyünden Hıristo v. Todori ve Todori v. Peratmoz’un müşterek ev, bağ, harman yeri ve tarlalarını Sava v. Nikola’ya satmaları Anadolu’dan emlâk mübâya‘ası Vilâyet-i Anadolu’da Niğde kazâsına tâbi‘ Dilmason karyesi ahâlisinden olup mahmiye-i İslâmbol’da Yedikule dâhilinde mütemekkinler Hıristo v. Todori ve Todori v. Peratmoz nâm zimmîler meclis-i şer‘-i şerîf-i enverde işbu hâmilü’r-rakīm Sava v. Nikola nâm zimmî muvâcehesinde herbiri ikrâr ve takrîr-i kelâm edip yedimizde mülk ve hakkımız olup karye-i mezbûrede vâki‘ bir tarafdan Aci Sanya menzili ve bir tarafdan Kişoğlu Hıristo zimmî menzili ve bir tarafdan Yuvan oğlu Yuvan zimmî menzili ve bir tarafdan tarîk-i âm ile mahdûd on bir göz kemer ve bir mikdâr bağçe ve zikr olunan Kişoğlu Hıristo zimmî tarafından sokak kapısını müştemil mülk menzil ile karye-i mezbûrede vâki‘ Ahlan nâm mahâlde kâin etrâf-ı erba‘adan Sünbüloğlu ve Bayramoğlu ve Karabiberoğlu Praşkova ve Anderankos veresesi bağları ile mahdûd yirmi beş karık mikdârı birbirine muttasıl iki kıt‘a kürûmu mülk bağ ve yine karye-i mezbûrede ma‘lûmü’l-aded eşcâr-ı müsmire ve yine karyede vâki‘ Sanya v. Lefter nâm zimmî ile müşterek harman yerinden nısf hissemizi tarafeynden îcâb ve kabûlü hâvî bey‘-i kat‘î ve safka-i vâhide ile merkūm Sava zimmîye otuz guruşa bey‘ ve temlik ve mahâllinde kabza taslît ve yine karye-i mezbûrede kâin lede’l-ahâli ve’l-cîrân ma‘lûmü’l-hudûd iki kıt‘a tarlalarımızı dahi seksen beş guruş bedel mukābilinde bâ-ma‘rifet-i sâhib-i arz ferâğ ve tefvîz eylediğimizde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen-i mezkûr yüz otuz guruş ile bedel-i merkūm seksen beş guruş ki cem‘an iki yüz on beş guruşu merkūm Sava zimmî yedinden münâsafeten tamamen ahz ü kabz eyledik, ba‘de’l-yevm zikr olunan menzil ve bağlar ve eşcâr-ı müsmire ve nısf harman yeri merkūm Sava zimmînin mülk-i müşterâsı ve tarla-yı mezkûrlar dahi dâhil-i havza-i tasarrufu olup bizim kat‘a alâka ve medhalimiz kalmamışdır dedikde gıbbe’t-tasdîki’ş-şer‘î mâ-vaka‘a. Fî 4 Ra sene 1197 Şühûdü’l-hâl: Mustafa Ağa b. Ömer, es-Seyyid İsmail Ağa b. İbrahim, Mustafa Ağa b. Ahmed Bey, Bektaş b. Abdullah, Ali Beşe b. Abdullah, Mehmed b. Mehmed. Dimitri oğlu Eftim, Abacıoğlu Peratmoz, Hoykaroğlu Sava, Sarı Kostandi v. Likori, Bayramoğlu Vasil, Hıristo v. Apostol, İstifan v. Sanya, Hoykaroğlu Kostandi, Kostandi v. Dimitri, İstavri v. Sanya, Kostandi v. Nikola, Simon v. Sünbül ve gayruhum.