Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 266 Hüküm no: 267 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolu sancağı Ulak kazası Kargalı köyünden Mehmed b. Mustafa’nın ev, harman yeri ve tarlalarını üvey oğlu Mehmed’e satması Anadolu’dan emlâk mübâya‘ası Vilâyet-i Anadolu’da Bolu sancağına muzâfe Ulak kazâsına tâbi‘ Kargalı karye ahâlisinden olup mahmiye-i İslâmbol’da Deniz Abdal mahallesinde sâkin Mehmed b. Mustafa nâm kimesne meclis-i şer‘-i şerîf-i enverde üveyi oğlu işbu bâ‘isü’l-kitâb Mehmed b. Abdullah nâm kimesne mahzarında ikrâr ve takrîr-i kelâm edip karye-i mezbûrede vâki‘ bir tarafdan Bayramlıoğlu Hasan menzili ve bir tarafdan müsâfir odası ve iki tarafdan tarîk-i âm ile mahdûd fevkānî bir bâb odayı müştemil bir bâb mülk menzil ile karye-i mezbûrede kâin Hacıoğlu Harmanı nâm mahâlde vâki‘ ma‘lûmü’l-hudûd harman yeri dört sehm i‘tibârıyla iki sehmi Mehmed ve İbrahim nâm karındaşların ve iki sehmi dahi benim yedimizde mülkümüz olmağın ben menzil-i mahdûd-ı mezkûr ile zikr olunan harman yerinde mâlik olduğum iki sehm hissemi ve ittisâlinde kâin bir bâb samanhâne ve yine karye-i mezbûrede vâki‘ ma‘lûmü’l-aded eşcâr-ı müsmiremi tarafeynden îcâb ve kabûlü hâvî bey‘-i kat‘î ve safka-i vâhide ile mezbûr Mehmed’e on beş guruşa bey‘ ve temlik ve mahâllinde kabzına taslît ve yine karye-i mezbûrede kâin lede’l-ahâli ve’l-cîrân ma‘lûmü’l-hudûd beş kıt‘a tarla ile karye-i mezbûre hâricinde vâki‘ kezâlik ma‘lûmü’l-hudûd bir kıt‘a tarla ki cem‘an altı kıt‘a tarlalarımı dahi bâ-ma‘rifet-i sâhib-i arz meccânen ferâğ ve tefvîz ve mahâllinde zabta taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semeni olan meblağ-ı mezbûr on beş guruş mütâlebesinden mezbûr Mehmed’in zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûr ile zikr olunan iki sehm harman yeri ve samanhâne ve eşcâr-ı müsmire mezbûr Mehmed’in mülk-i müşterâsı ve hakk-ı sarfı ve tarla-yı mezkûrlar dahi dâhil-i havza-i tasarrufu olup benim kat‘a alâka ve medhalim kalmamışdır, mahâllinde mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 7 min-Rebî‘ülevvel sene 1197 Şühûdü’l-hâl: Ahmed Ağa b. Osman, Mehmed Ağa b. İbrahim, İbrahim Beşe b. Mustafa, Abdullah Beşe b. Mustafa, Ebûbekir Ağa b. Mustafa, İbrahim b. Memiş, Molla Ali b. Halil, Ali b. İbrahim, Kādıoğlu İsmail b. Mehmed ve gayruhum.