Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 223 Hüküm no: 179 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Selim Ağa’nın açtığı miras davasında anlaşma sağlanması Ma‘rûz, Medîne-i Üsküdar’da Ayazma mahallesinde sâkin iken bundan akdem vefât eden Soğancıbaşı vekîli el-Hâc Mehmed Emin Ağa b. Hüseyin’in verâseti zevce-i menkûha-i metrûkesi Şerife Hadice Hanım bt. es-Seyyid Mustafa ile sulbiye kebîre kızları Şerife Hanife ve Şerife Münire Hanımlara ve li-ebeveyn er karındaşı es-Seyyid Mehmed Selim Ağa’ya inhisâr ve müteveffâ-yı mezbûrun sülüs vasîsi olmağla vesâyâ-yı mu‘ayyene ve gayr-ı mu‘ayyenesine âid oldukdan sonra verese-i merkūmûndan sâhib-i arzuhâl mezbûr es-Seyyid Mehmed Selim Ağa Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde isimleri mezkûre zâtları mu‘arrefeler mezbûretân Şerife Hadice ve Şerife Hanife ve Şerife Münire Hanımlar muvâcehelerinde mûrisimiz müteveffâ-yı mezbûrun terekesi bundan akdem ma‘rifet-i şer‘le tahrîr ve taksîm olunup sülüsü vesâyâ-yı mezkûresi için ihrâç olundukdan sonra mümzâ ve mahtûm bir kıt‘a defter-i kassâm nâtık olduğu üzere her birimiz hisse-i irsiye-i şer‘iyyemizi tereke-i müteveffâ-yı mezbûrdan olarak ahz u kabz edip ancak mezbûrât Şerife Hadice ve Şerife Hanife ve Şerife Münire Hanımlar müteveffâ-yı mezbûrun hîn-i vefâtında yanında bulunduklarına binâen tereke-i müteveffâ-yı mezbûr defter olunmak üzere hâric-ez defter-i kassâm-ı mezkûr mecmû‘u otuz bin dört yüz guruş kıymetli on dokuz aded kehribâ çubuk takımı ve bir çift zümrüd küpe ve beş Lahor şalı ve biri şala kaplı ve biri geziye kaplı iki samur kürk ve altı yüz vakiyye evânî-i nühâsiyeyi bi’l-ma‘iyye fuzûlî ahz ve ketb ü ihfâ etmeleriyle eşyâ-i muharrere-i mezkûre mevcûde ise aynılarını müstehleke ise ba‘de’s-sübût kıymet-i mezkûreleri olan otuz bin dört yüz guruşun sülüsü ba‘de’l-ihrâç sülüsânından hisse-i irsiye-i şer‘iyyesi bana tazmîne mezbûrât Şerife Hadice ve Şerife Hanife ve Şerife Münire hanımlara tenbîh olunmak bi’l-verâse matlûbumdur deyü tasaddî eylediğim da‘vâmdan an-inkâr mezbûrât ile kat‘an li’n-nizâ‘ yedi yüz guruş üzerine sulh olduğumda onlar dahi sulh-ı mezkûru kabûl ve bedel-i sulh-ı mezkûr yedi yüz guruşu çend rûz zarfında bana edâya ta‘ahhüd etmeleriyle meblağ-ı mezkûr yedi yüz guruşdan müteveffâ-yı merkūmun hayatında ile’l-vefât her biri müstakıllen yedinde malı ve ba‘de vefât benimle mezbûrâta mevrûs ve vesâyâ-yı mezkûresine âid olup zabt ve terekesine idhâle henüz dest-res olunmayan Gönen karyesinde vâki‘ her biri ma‘lûmü’l-hudûd dört göz âsiyâbdan mâ‘adâ husûs-ı mezkûra ve müteveffâ-yı mezbûrun bi’l-cümle terekesine ve hukūk-ı mîrâsa müte‘allika âmme-i de‘âvîden tarafeynden her birimiz âharın zimmetini bi’l-verâse ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü mukırr-ı merkūm Mehmed Selim Ağa’nın bi’l-cümle takrîr-i meşrûhunu mezbûrât Şerife Hadice ve Şerîfe Hanife ve Şerife Münire Hanımlardan herbirinin tasdîk eyledikleri tescîl ve huzûr-ı [âlîlerine i‘lâm olundu]. Fî 8 S sene [12]57