Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 267 Hüküm no: 268 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Hafize bt. Üveys’in bakmakta olduğu küçük kızı için boşandığı kocasından nafaka alması Nafaka-i sagīr Mahmiye-i İslâmbol’da Topkapısı dâhilinde Kürkçübaşı mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Hafize bt. Üveys nâm hatun meclis-i şer‘-i hatîr-i lâzımü’t-tevkīrde zevc-i mutallıkı el-Hâc Osman b. Hüseyin mahzarında takrîr-i kelâm ve bast-ı merâm edip zevc-i mutallıkım mezbûr el-Hâc Osman’ın firâşından hâsıla ve benden mütevellide ve hâlâ bi-hakkı’l-hıdâne hacr u terbiyemde işbu sadriye sagīre kızım Rukiye’nin mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisvesi içün babası mezbûr el-Hâc Osman üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisvesi içün babası mezbûr el-Hâc Osman üzerine bi’t-terâzî târih-i kitâbdan küllü yevm on dörder akçe farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr el-Hâc Osman üzerine rücû‘a mezbûre Hafize Hatun’a izin vermeğin mâ-vaka‘a. Fî 7 Ra sene 1197 Şühûdü’l-hâl: İmâm Mustafa Efendi b. Hüseyin, Müezzin Mustafa Efendi b. Mehmed, İbrahim Çavuş Ağa b. el-Hâc İsmail, Ahmed Ağa b. el-Hâc Mehmed, Molla Ali b. Halil.