Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 267 Hüküm no: 269 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden Ayşe bt. Abdullah’ın evinde çalıştığı Rukiye bt. Abdullah’tan ücretini alarak zimmetini ibra etmesi Ecr-i mislinden ibrâ Mahmiye-i İslâmbol’da el-Hâc Evhaddin mahallesinde sâkine ve zâtı vech-i şer‘î üzere mu‘arrefe olan Âişe bt. Abdullah nâm hatun meclis-i şer‘-i şerîf-i enverde işbu bâ‘isetü’l-kitâb Rukiye bt. Abdullah nâm hatunun zevci ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Salih b. Mehmed nâm kimesne mahzarında ikrâr ve takrîr-i kelâm edip bundan akdem müvekkil-i mezbûre Rukiye Hatun’un talebiyle sıgār ve kiberim hâllerinde târih-i kitâba gelince bilâ-tesmiyeti’l-ücret on beş sene mikdârı menzilinde hizmetim sebk etmişidi. El-hâletü hâzihî müddet-i merkūmede sebk eden hizmetimin ecr-i misli mukābelesinde müvekkile-i mezbûre Rukiye Hatun mâlından bana bir Mushaf-ı şerîf ve bir çift altın kuşak ve zümrüd taşlı bir çift altın küpe ve zümrüd taşlı bir altın yüzük ve elmas taşlı bir altın yüzüğünü def‘ ü teslîm eyledikde ben dahi bi-a‘yânihâ yedinden tamamen ahz ü kabz edip müddet-i merkūmede sebk eden hizmetimin şer‘an lâzım gelen ecr-i misline müte‘allika âmme-i de‘âvî ve kâffe-i mutâlebâtdan müvekkile-i mezbûre Rukiye Hatun ile zevci işbu vekîl-i mezbûr Salih’den herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-şehri Rebî‘i’l-evvel li-sene seb‘a ve tis‘în ve mi’e ve elf. Şühûdü’l-hâl: Ali Efendi b. Mehmed, Halil Efendi b. Mehmed, Molla Mustafa b. ( ), Süleyman Bölükbaşı, Emrullah Bölükbaşı, Memiş Ağa b. ( ), Mahmud Beşe b. ( ), Kahveci Molla Abdullah, Müezzin Molla Mustafa, Molla Ali b. Halil ve gayruhum.