Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 224 Hüküm no: 180 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un vefat eden eski eşine mirasçı olamayacağı Ma‘rûz, Medîne-i Üsküdar’da Hayreddin Çavuş mahallesinde sâkine sâhibe-i arzuhâl mu‘arrefetü’z-zât Şerife Fâtıma Hatun bt. es-Seyyid Ahmed şifâhen sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde zevc-i mutallıkı medîne-i mezkûreye muzâfe Gekbüze kazâsına tâbi‘ Kartal kasabasında sâkin iken bin iki yüz elli altı senesi şehr-i Ramazani’l-mübârekinin on yedinci günü vefât eden derûn-ı arzuhâlde mezkûrü’l-ism Süleyman Ağa b. Ömer’in verâseti sulbî sagīr oğulları Mehmed Salim ve Mehmed Tahir ve sulbiye kebîre kızı gāibetü ani’l-beled Hafize Hatun’a ba‘de’l-inhisâr gāibe-i mezbûrenin pederi müteveffâ-yı mezbûrdan mevrûs malını hıfza ve sagīrân-ı mezbûrânın tesviye-i umûrlarına bâ-hüccet-i şer‘iyye vasiyy-i mansûbları olmağla tereke-i müteveffâ-yı mezbûre bi’l-vesâye vâzı‘u’l-yed olan müteveffâ-yı mezbûrun li-ebeveyn er karındaşı derûn-ı arzuhâlde mezkûrü’l-ism Mustafa Ağa b. el-mezbûr Ömer muvâcehesinde ben müteveffâ-yı mezbûrun hayatında iki yüz yirmi beş guruş mehr-i müeccel tesmiyesiyle zevce-i menkûha-i medhûlün-bihâsı iken sene-i mezkûre Şa‘bân-ı şerîfi’nin yirminci günü sâhib-i firâş olduğu hâlde ric‘iyyen beni tatlîk ve mehr-i müeccel-i mezkûrum olan iki yüz yirmi beş guruş ile nafaka-i iddet-i ma‘lûmem için beynimizde ta‘yîn olunan üç yüz guruşu bana edâ eyledikden sonra yirmi yedi gün mürûrunda iddetim münkaziye olmaksızın vefât etmekle ol vechile ben dahi müteveffâ-yı mezbûra vâris olmamla hisse-i irsiye-i şer‘iyyemi bana teslîme vasiyy-i mezbûre Mustafa Ağa’ya tenbîh olunmak matlûbumdur deyü da‘vâ etdikde ol dahi cevâbında müdde‘iyye Şerîfe Fâtıma Hatun müteveffâ-yı mezbûr Süleyman Ağa’nın hayatında ber-vech-i muharrer iki yüz yirmi beş guruş mehr-i müeccel tesmiyesiyle zevce-i menkûha-i medhulün-bihâsı olduğunu ikrâr lâkin karındaşım mezbûr hayatında sene-i mezkûre Cemâziyelûlâsı’nın beşinci günü zikr olunan Kartal kasabasında bâyinen tatlîk ve mehr-i müeccel-i mezkûru ile nafaka-i iddet-i mu‘ayyene-i mezkûresini kabzını mu‘arrefe olduğu üzere müdde‘iyye-i mezbûreye teslîm ve yüz otuz iki gün mürûrunda vefât etmiş idi deyü müdde‘iyye-i [50a] mezbûrenin inkârına mukārin mukaddem târîhiyle eylediği talâk müdde‘âsını her biri mahallerinden lede’t-tezkiye adl ve makbûlü’ş-şehâde idükleri ihbâr olunan kasaba-i mezbûre tahsîldârı Mehmed Ali Ağa b. Ahmed ve Muhtâr el-Hâc Hüseyin Ağa b. Mustafa nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iyye-i mezbûre Şerife Fâtıma Hatun tereke-i müteveffâ-yı mezbûrdan ber-minvâl-i meşrûh hisse-i irsiye müdde‘âsıyla bi-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 20 S sene [12]57.