Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 225 Hüküm no: 181 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin vefat eden Fâtıma Hanım’ın mirasından dolayı Zeliha Hanım aleyhinde miras iddiasında bulunmaktan men edilmesi Derûn-ı arzuhâlde mezkûrü’l-ism olup İstanbul’da Sultan Ahmed Han -tâbe serâhu- hazretleri câmi‘-i şerfi kurbünde Kapıağası Mahmud Ağa mahallesinde sâkine iken bundan akdem vefât eden Fâtıma Hanım bt. Mühürdâr Ahmed Efendi’nin verâseti sadriye kebîre kızı Zeliha Hanım bt. Hasan ile li-ebeveyn er karındaşı Hüseyin Efendi’ye inhisârı tahakkukundan sonra sâhib-i arzuhâl merkūm Hüseyin Efendi Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde kezâlik derûn-ı arzuhâlde mezkûretü’l-ism bint-i mezbûre Zeliha Hanım’ın zevci ve tarafından husûs-ı âti’l-beyânda vekîl olduğu zâtını ârifân Osman Efendi b. Hasib ve Mehmed Salim Efendi b. Osman nâm kimesneler şehâdetleriyle ber-nehc-i şer‘î sâbit olan Hasan Ağa b. Süleyman muvâcehesinde müvekkile-i merkūme Zeliha Hanım mahalle-i mezbûrede kâin bir bâb menzilde hemşîrem mezbûre ile hayatında ma‘an sâkineler olmak takrîbiyle mûrisemiz hemşîrem müteveffât-ı mezbûre Fâtıma Hanım’ın hîn-i vefâtında menzil-i merkūmda mevcûde bi’l-cümle terekesi olan mecmû‘-ı mezbûrdan bin üç yüz elli guruş kıymetli üç kıt‘a mushaf-ı şerîf ve bir şifâ-i şerîf ve altın üzerine masnû‘ üç aded elmas çiçek ve altı aded elmas pat resmi iğne ve iki çift zümrüd küpe ve bir elmas gerdâniye ve iki elmas gül yüzük ve bir zümrüd yüzük ve iki yâkut yüzük ve bir elmas zikir ve bir elmas bilezik ve bir elmas başlı kuşak ve on miskāl inci <> ve iki zümrüd âsafî ve bir merkût sâ‘at ve iki Paris sâ‘at ve bir asma sâ‘at ve üç endâm aynası ve iki sîm kebîr şamdan ve bir sîm fiske şamdanı ve iki sîm tas ve bir sîm gülâbdan ma‘a buhurdan ve bir tombak sini ve iki yıldızlı sini ve on tombak zarf ve iki samur kürk ve iki nîm samur kürk ve iki nâfe kürk ve iki şal ve üçü savâî ve dördü şâlî cem‘an dokuz anteri ve bir şal cübbe ve iki fermâyiş şal ve üç marpiç şal ve iki rızâî şal ve bir şal boğça ve dört çatma oda döşemesi ve ikisi çuka ve ikisi atlas cem‘an dört kebîr zâr üçü savâî ve altısı kalemkâr ve sekizi çit cem‘an on yedi yorgan ve on baş yasdığı ve on yüz yasdığı ve on şilte ve dördü kara ve beşi çit cem‘an dokuz döşek ve on çârşeb ve dört yüz vakiyye evânî-i nühâsiye ve bir dökme mangal ve bir re’s zenciye câriye ile medîne-i Üsküdar’a tâbi‘ Kādı karyesinde kâin Yonca Bostanı demekle şehîr bir bâb bostan derûnunda mevcûd gedik ta‘bîr olunur ber-vech-i mülkiyet âlât-ı lâzıme-i ma‘lûmenin nısfı benim ve nısf-ı âharı hemşîrem müteveffât-ı mezbûrenin iştirâken yedimizde mülkümüz olup ba‘de vefâtihâ zikirleri sebkat eden eşyâ ve câriye ve nısf âlât-ı gedik-i mezkûrdan her biri benimle müvekkile-i mezbûre bana mevrûs olmuş iken müvekkile-i merkūme Zeliha Hanım zikirleri mürûr eden eşyâ ve câriye ve nısf hisse-i şâyi‘ayı müstakıllen fuzûlî zabt ve vaz‘-ı yed etmekle eşyâ-i muharrere-i mezkûre ile câriye-i mezbûre mevcûde ise aynlarını müstehleke ise ba‘de’s-sübût kıymet-i mezkûreleriyle nısf hisse-i şâyi‘a-i merkūmeden keff-i yed ve hisse-i irsiye-i şer‘iyyemi bana teslîme müvekkile-i mezbûreye izâfetle vekîl-i merkūm Hasan Ağa’ya tenbîh olunmak bi’l-verâse matlûbumdur deyü da‘vâ etdikde vekîl-i mezbûr dahi cevâbında yedimde olup işbu bin iki yüz eli altı senesi şehr-i Rebî‘ülâhirinin on birinci günü târîhiyle müverraha ve hâlâ İstanbul kādısı izzetlü fazîletlü Mehmed Tevfik Beyefendi hazretlerinin imzâ ve hatemini hâviye bir kıt‘a hüccet nâtıka olduğu kıbel-i şer‘den mürsel kâtib Ahmed Hamid Efendi’nin menzil-i mezkûrda huzûr-ı Müslimînde akdeylediği meclis-i şer‘de zevcem ve müvekkilem mezbûrenin vâlidesi ve mûrisesi müteveffât-ı mezbûreye Fâtıma Hanım hâl-i hayatında ve kemâl-i akl ü sıhhatinde zikirleri sebkat eden bir re’s câriye ve bir elmas yüzük ve bir koyun sâ‘ati malından ifrâz ve hibe-i sahîha-i şer‘iyye ile kızı müvekkilem mezbûre Zeliha Hanım’a hibe ve temlîk ve yine yedinde malı olan bir köhne şal anteri ve bir sevâyîsi anteri ve bir köhne nîm şal ve dört yorgan ve iki çârşeb ve iki yün memlû döşek ve penbe memlû iki döşek şiltesi ve iki baş yasdığı ve yün memlû altı koltuk yasdığı ve dört minder ve iki erkân minderini dahi bin beş yüz guruşa bey‘ ve teslîm eylediğinde ol dahi ber-vech-i muharrer irtihâb ve iştirâ ve temellük ve kabz ve kabûl eyledikden sonra müteveffât-ı mezbûre Fâtıma Hanım semen-i mezkûr bin beş yüz guruşun mutâlebesine ve bi’l-cümle husûs-ı mezkûra ve târîh-i merkūma gelince sâir cemî‘ hukūk-ı şer‘iyyeye müte‘allika âmme-i da‘vâdan zevcem ve müvekkilem merkūme Zeliha Hanım’ın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt edip câriye-i mezbûre ile eşyâ-i muharrere-i mezkûrede kat‘an alâka ve medhali kalmayıp kızı müvekkilem mezbûre Zeliha Hanım ile ma‘an sâkine oldukları menzil-i mezkûr derûnunda mevcûde lâbise olduğu köhne libâsından gayrı ismi mâl ıtlâk olunur bi’l-cümle melbûsât ve mefrûşât ve evânî-i sîm ve nühâsiye ve gayr-ı nühâsiyede aslâ ve kat‘â alâka ve medhali kalmayıp mecmû‘u zevcem ve müvekkilem mezbûre Zeliha Hanım’ın emvâl-i mevhûbe ve müşterâtı ve hakk-ı sırfı olduğunu ve mârru’z-zikr âlât-ı gedik-i mezkûrdan ber-vech-i muharrer mâlike olduğu nısf hisse-i şâyi‘asını dahi yine târîh-i mezkûr ile müverrah kezâlik kādı-i mûmâ-ileyhin hatemiyle mahtûm bir kıt‘a i‘lâmı nâtık olduğu üzere semen-i ma‘lûm ve makbûza yine kızı müvekkile-i merkūmeye bey‘ ve temlîk ve vech-i lâyıkıyla teslîm ve ol vechile âlât-ı gedik-i mezkûrda dahi kat‘an alâka ve medhali kalmadığını ikrâr etmiş idi deyü mazmûnları min-külli’l-vücûh vekîl-i mezbûrun takrîrine mutâbık ve i‘lâm-ı mezkûrları ibrâzıyla eylediği def‘ini ve mazmûn-ı hüccet ve i‘lâm-ı mezkûrları merkūm Hüseyin Efendi bi-tamâmihî ikrâr ve tasdîk edip lâkin hemşîrem mûrisemiz müteveffât-ı mezbûrenin sinni doksandan mütecâviz [50b] olup ol vechile ma‘tûhe ve muhtelü’d-dimâ‘ olmağla mârru’z-zikr hibe ve bey‘ ve ikrâr-ı mezkûrları sahîh ve mu‘teber değildir deyüp vekîl-i mezbûr dahi müteveffât-ı mezbûre Fâtıma Hanım’ın hibe ve bey‘ ve ikrârı hayatında kemâl-i akl ü sıhhatinde olmuş olmağla sahîh ve mu‘teberdir deyü bi’l-vekâle da‘vâ ve akl beyyinesi şer‘an evlâ olduğu kütüb-i mu‘teberede mastûr olmağla vekîl-i mezbûr Hasan Ağa ber-vech-i muharrer müdde‘âsını her biri mahallerinden lede’t-tezkiye adl ve makbûlü’ş-şehâde idükleri ihbâr olunan Hasan Efendi b. Mustafa ve Müezzin İsmail Efendi b. Ömer nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince müdde‘î-i mezbûr Hüseyin Efendi bi’l-verâse da‘vâ-yı mezkûreleriyle müvekkile-i merkūme Zeliha Hanım’a izâfetle zevci vekîl-i merkūm Hasan Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 29 M sene [12]57.