Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 286 Hüküm no: 292 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzincan’ın Cemaleddin mahallesinden Ebubeşe b. Feyzullah’ın oğlu Salih’in, babasının gözünü çıkaran Köşünker-i Kebir köyünden Ömer Ağa ile sulh olması Göz diyetinden ibrâ Vilâyet-i Anadolu’da Erzincan mahallâtından Cemaleddin mahallesinde sâkin Ebubeşe b. Feyzullah nâm kimesnenin sulbî kebîr oğlu ve tarafından husûs-ı âti’l-beyânda sâbitü’l-vekâle vekîl Salih nâm kimesne meclis-i şer‘-i şerîf-i enverde yine mezbûre kurâlarından Köşünker-i Kebîr karyesi ahâlisinden işbu bâ‘isü’l-vesîka Ömer Ağa bundan akdem medîne-i mezbûrede babam müvekkilim mezbûrun gözünü ihrâc etmekle mûcib-i şer‘îsini mezbûr Ömer Ağa’dan bi’l-vekâle taleb ve da‘vâya tesaddî eylediğimde ol dahi bi’l-külliye inkâr etmişidi. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden mezbûr Ömer Ağa ile nakid elli guruş ve bir tüfenk ve bir sîmli taban kılıcı üzerine inşâ-i akd-i sulh eylediklerinde ben dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûr nakid elli guruş ile zikr olunan tüfenk ve kılıcı mezbûr Ömer Ağa yedinden bi’l-vekâle tamamen ahz ü kabz edip husûs-ı mezkûra ve mâ-yahdüsü minhe müte‘allika âmme-i da‘vâdan ve kâffe-i mutâlebâtdan mezbûr Ömer Ağa’nın zimmetini bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîk. Fî 18 min-Ra sene 1197 Şühûdü’l-hâl: Es-Seyyid Mehmed b. es-Seyyid Hamza İmâm, Keçeci Seyyid İbrahim Beşe, Emîr Ali Beşe, Halil Beşe, Süleyman Ağa b. Mehmed, Mustafa Ağa b. Mehmed, Hasan Ağa b. Osman, Musa Ağa b. Mustafa, Hüseyin Ağa b. Mehmed, Molla Ali b. Halil.