Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 286 Hüküm no: 293 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaki mahallesinden Fatma bt. Abdullah’ın Habibe bt. Abdullah ile müşterek ev arsalarına ait zayi olan hüccetin yenilenmesini istemesi İstihbâr-ı arsa Mahmiye-i İslâmbol’da Hocapaşa kurbünde Karaki mahallesinde sâkine ve zât-ı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu râfi‘atü’l-vesîka Fatıma bt. Abdullah nâm hatun meclis-i şer‘-i şerîf-i enverde takrîr-i kelâm ve bast-ı merâm edip mahmiye-i mezbûrede Seydihalîfe mahallesinde vâki‘ bir tarafdan es-Seyyid Hasan Efendi menzili ve bir tarafdan tarîk-i âm ile ve iki tarafdan tarîk-i hâs ile mahdûd derûnunda dört bi’r-i mâ ve bir harâb hamam ve bir su hazînesi ve sâir enkāz-ı ma‘lûmeyi hâvî bir bâb muhterik mülk menzil arsasının dört sehm i‘tibârıyla üç sehmi benim ve bir sehm-i şâyi‘i dahi işbu hâzıra bi’l-meclis Habibe bt. Abdullah nâm hatunun sâbıkā İslâmbol Ağası Ebûbekir Ağa’dan semen-i makbûza müşterâ ve târih-i kitâba gelince otuz sene bilâ-nizâ‘ bâ-hüccet-i şer‘iye yedimde mülküm ve hakkımız olup lâkin menzil-i mezkûr ile yedimizde olan mülknâme hüccetimiz bundan akdem vâki‘ olan harîk-i kebîr’de muhterik olmağla arsa-i mezkûre ber-vech-i muharrer mülk-i müşterâmız olduğunu müş‘ir yedimizde hüccetimiz olmamağla takrîrim vukūf-ı tammı olan bî-garaz Müslimînden suâl ve istihbâr ve haberleri zabt u tahrîr ve kıbel-i şer‘den hüccet olunup yedimize i‘tâ olunmak matlûbumuzdur dedikde fi’l-hakīka arsa-i mezkûrenin üç sehm-i şâyi‘i mezbûre Fatıma Hatun’un ve bir sehm-i şâyi‘i dahi mezbûre Habibe Hatun’un sâbıkā İslâmbol Ağası Ebûbekir Ağa’dan semen-i medfû‘-ı makbûza müşterâ ve târih-i kitâba gelince otuz sene bilâ-nizâ‘ bâ-hüccet-i şer‘iye yedlerinde mülkleri olduğunu mârrü’z-zikr Seydihalîfe mahallesi ahâlisinden Ömer Efendi b. Mehmed ve es-Seyyid Hüseyin b. Mehmed ve Mustafa b. Ahmed nâm kimesneler meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl ketb olundu. Fî 19 min-Ra sene 1197 Şühûdü’l-hâl: Ömer Efendi b. Mehmed, es-Seyyid Hüseyin b. Mehmed, Mustafa b. Ahmed, Hasan Ağa b. İbrahim ve gayruhum.