Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 287 Hüküm no: 294 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaki mahallesinden Fatma bt. Abdullah’ın Habibe bt. Abdullah ile müşterek olduğu ev arsasındaki hisselerinden bir hissesini Bostancı Ahmed Ağa’ya satması Mübâya‘a-i arsa Mahmiye-i İslâmbol’da Hocapaşa kurbünde Kareki mahallesinde sâkine ve zâtı ta‘rîf-i şer‘î ile mu‘arrefe olan Fatıma bt. Abdullah nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Bostânî Ahmed Ağa b. Mehmed nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Seydihalîfe mahallesinde vâki‘ bir tarafdan es-Seyyid Hasan Efendi menzili arsası ve iki tarafdan tarîk-i hâs ve bir tarafdan tarîk-i âm ile mahdûd derûnunda dört bi’r-i mâ ve bir harâb hamam ve bir su hazînesi ve sâir enkāz-ı mevcûde-i ma‘lûmeyi hâvî bir bâb muhterik mülk menzil arsasının dört sehm i‘tibârıyla bir sehm-i şâyi‘i işbu hâzıra bi’l-meclis Habibe bt. Abdullah nâm hatunun ve üç sehm-i şâyi‘i benim yedimizde mülk ve hakkımız olup ben ber-vech-i muharrer arsa-i mahdûde-i mezkûrede mâlik olduğum üç sehmimin bir sehm-i şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Bostânî Ahmed Ağa’ya yüz guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruş mutâlebesinden mezbûr Bostânî Ahmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûrede olan üç sehmimin bir sehm-i şâyi‘i mezbûr Bostânî Ahmed Ağa’nın mülk-i müşterâsı ve hakk-ı sarfı olup benim alâka ve medhalim kalmamışdır dedikde gıbbe’t-tasdîki’ş-şer‘î. Fî 19 min-Ra sene 1197 Şühûdü’l-hâl: Eş-şâhidûnü’s-sâbıkūn.