Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 288 Hüküm no: 295 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsus mahallesinden Fatma bt. Abdullah’ın Hadice bt. Yusuf’a yüz kuruş parasını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Tarsus mahallesinde sâkine ve zâtı vech-i şer‘î üzere mu‘arrefe olan Fatıma bt. Abdullah nâm hatun meclis-i şer‘-i şerîf-i enverde kezâlik mu‘arrefetü’z-zât işbu bâ‘isetü’l-kitâb Hadice bt. Yusuf nâm hatun mahzarında ikrâr ve takrîr-i kelâm edip yedimde mâlım olan yüz guruş nukūdumu hibe-i sahîha-i şer‘iye ile mezbûre Hadice Hatun’a hibe ve temlik ve teslîm ve eşyâ-i memlûkemden yapağı memlû altı beledî yasdık ve iki minder ve üç yemeni yorgan ve üç çârşeb ve iki yemeni yasdık ve üç iş makramesi ve iki bilek ve bir çuka ferâce ve bir Bursa kuşağı ve bir bogasi hırka ve bir şali cübbe ve bir şali entari ve bir çiçekli entari ve bir şalî hırka ve bir havlu ve bir anbar, iki kadayıf tepsisi ve beş sahan ma‘a kapak ve iki tencere ma‘a kapak ve bir kebîr tencere ma‘a kapak ve bir kazgan ve bir şorba tası ma‘a kapak ve bir bakraç ve bir sagīr tepsi ve dört kahve ibriği ve sepet sandığımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Hadice Hatun’a elli guruşa bey‘ ve temlik ve teslîm eylediğimde ol dahi ber-vech-i muharrer ittihâb ve iştirâ ve temellük ve tesellüm ve kabz u kabûl eyledikden sonra semeni olan meblağ-ı mezbûr elli guruş mütâlebesinden dahi mezbûre Hadice Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm nakd-i mezbûr yüz guruş mezbûre Hadice Hatun’un mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 17 min-Ra sene 1197 Şühûdü’l-hâl: Mehmed Said Efendi b. Ali İmâm-ı mahalle-i mezbûr, Seyyid Molla Mustafa b. Hasan Müezzin-i mahalle, İsmail Ağa b. Hasan, Mehmed Said Ağa b. Mehmed, Mustafa Beşe b. Ebûbekir, Molla Ali b. Halil, Salih b. Halil, Mustafa b. Mustafa.