Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 289 Hüküm no: 296 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu Kalemi Başhalifesi Mustafa Efendi’nin Mehmed Tâhir Efendi’den müşterek oldukları evdeki hissesini satın alması İn‘âm, husûs Husûs-ı âti’l-beyânın mahâllinde ketb ü tahrîri iltimâs olunmağın bu fakīr mahmiye-i İslâmbol’da Çarşamba Pazarı kurbünde Koğacı Dede mahallesinde kâin hâlâ Anadolu Kalemi başhalîfesi umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam sa‘âdetlü Mustafa Efendi b. Mehmed Efendi’nin sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i hatîr etdikde mahmiye-i mezbûrede Cebeci mahallesinde kâin bir tarafdan eşrâf-ı kuzâtdan Arabzâde kerîmesi menzili ve bir tarafdan Nefise Hatun arsası ve iki tarafdan tarîk-i âm ile mahdûd dâhilen ve hâricen büyût-ı adîde ve müştemilât-ı sâire-i ma‘lûmeyi hâvî bir bâb mülk menzil iki yüz sehm i‘tibârıyla yüz elli sekiz sehmi irsen ve şirâen mûmâ-ileyh Mustafa Efendi’nin ve kırk iki sehmi Mehmed Tâhir Efendi b. Ahmed Efendi’nin irsen yedlerinde mülkleri olduğu lede’ş-şer‘i’l-enver zâhir ve mütehakkık oldukdan sonra mûmâ-ileyh Mehmed Tâhir Efendi meclis-i ma‘kūd-ı mezkûrede bâ‘isü hâze’l-kitâbi’l-müstetâb mûmâ-ileyh Mustafa Efendi mahzarında ikrâr ve takrîr-i kelâm edip ben bâlâda tahdîd ve tavsîf olunan menzil-i mezkûrda ber-vech-i muharrer mâlik olduğum kırk iki sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Mustafa Efendi’ye dört yüz yirmi guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz yirmi guruşu mûmâ-ileyh Mustafa Efendi yedinden tamamen ahz ü kabz edip mebî‘-i mezkûrun gabn [ü] tağrîrine müte‘allika âmme-i de‘âvî ve kâffe-i mütâlebâtdan mûmâ-ileyh Mustafa Efendi’nin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûrda i‘tibâr-ı mezkûr üzere olan kırk iki sehmde benim aslâ alâka ve medhalim kalmayıp mûmâ-ileyh Mustafa Efendi’nin mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 min-Ra sene 1197 Şühûdü’l-hâl: Mevâlî-i i‘zâmdan sâbıkā Kayseriye kādısı Şeyhzâde Sunullah Efendi, Hoca Hasan Efendi b. Halil, Fahrü’l-eimme es-Seyyid Osman Efendi b. es-Seyyid Ahmed, Müezzin İbrahim Efendi b. Mehmed, Molla Abdürrezzak b. Derviş İbrahim, es-Seyyid Ahmed Besim Efendi b. Ahmed Efendi, es-Seyyid Şakir Efendi b. el-Hâc Salih Efendi, Uncuzâde Mehmed Emin Efendi b. Ahmed, Molla Mehmed b. Halil.