Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 290 Hüküm no: 297 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süvâri Mukabelesi halifelerinden Abdülbâki Efendi’nin saman mahzeni hissesini Zeliha Hatun’a satması Hisse mübâya‘ası Mahmiye-i İslâmbol’da el-Hâc Pîrî mahallesinde sâkin Mukābele-i Süvârî hulefâlarından Abdülbâki Efendi b. İsmail meclis-i şer‘-i hatîrde işbu râfi‘atü’l-vesîka Zeliha Hatun bt. Nuh tarafından husûs-ı âti’l-beyânı tasdîka vekîl olduğu ber-nehc-i şer‘î ve tarîk-i mer‘î üzere sâbit olan el-Hâc Mehmed b. Ahmed nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Davudpaşa iskelesi kurbünde Kasab İlyas mahallesinde vâki‘ ma‘lûmü’l-hudûd ve’l-müştemilât mukāta‘alı bir bâb saman mahzeninin kırk sekiz sehm i‘tibârıyla altı sehmi müvekkile-i mezbûre Zeliha Hatun’un ve yirmi dört sehmi Hadice nâm sagīrenin ve beş sehmi Hasan nâm kimesnenin irsen yedlerinde mülkleri ve on üç sehmi dahi benim bâ-hüccet-i şer‘iye şirâen yedimde mülk ve hakkım olmağın ben zikr olunan mahzende ber-vech-i muharrer mâlik olduğum on üç sehmi tarafeynden îcâb ve kabûlü hâvî şurût-ı müfside ve mu‘ârazadan ârî bey‘-i bâtt-ı sahîh-i şer‘î ile müvekkile-i mezbûre Zeliha Hatun’a yüz yirmi guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz yirmi guruşu müvekkile-i mezbûre Zeliha Hatun yedinden tamamen ahz ü kabz eyledim, ba‘de’l-yevm mahzen-i mahdûd-ı mezkûrun on üç sehmi dahi müvekkile-i mezbûre Zeliha Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe. Fî 20 min-Ra sene 1197 Şühûdü’l-hâl: Sabri Ahmed Efendi b. İsmail, Molla Ali b. Halil, Salih b. Halil, Hüseyin b. Ahmed, Mehmed Çavuş b. Ahmed, İbrahim b. Mehmed, Çukadâr Ali Ağa b. Mehmed ve gayruhum.