Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 228 Hüküm no: 182 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Ağa’nın İbrahim Bey aleyhinde tımar davasında bulunmaktan men edilmesi Kadıkendi karyesinin öşür mahsulü men‘i Ma‘rûz, Sâhib-i arzuhâl Feyzullah Ağa b. Yusuf nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde derûn-ı arzuhâlde mezkûrü’l-ism Kemah kazâsı voyvodası sâbık Serbevvâbîn-i Dergâh-ı âli İbrahim Bey b. el-Hâc Abdullah b. İbrahim tarafından husûs-ı âti’l-beyânda vekîl olduğu el-Hâc Şakir Ağa b. Abdullah ve el-Hâc Yusuf Ağa b. Yusuf nâm kimesneler şehâdetleriyle sâbit olan Hafız Hüseyin Efendi b. Mehmed muvâcehesinde ben Asâkir-i Mansûre süvârîsine ilhâk olunan timârlardan Erzurum sancağında Diğersun nâm karye ve gayriden iki yüz elli akçe timâra bin iki yüz kırk yedi senesinden beri bâ-berât-ı âlîşân mutasarrıf olup lâkin müvekkil-i mûmâ-ileyh İbrahim Bey bundan akdem kazâ-i mezkûrda voyvoda iken timâr-ı mezkûrum dâhilinde Kadıkendi nâm karyenin kavm-i nâ-mahsûr olan re‘âyâsından sekiz sene müddetde hâsıl olan iki yüz kırk keyl hınta ve iki yüz kırk keyl şa‘îr öşür mahsûlü fuzûlî ve bi-gayr-ı hakkın ahzetmekle mahsûlât-ı mezkûreyi müvekkil-i mûmâ-ileyh İbrahim Bey’den taleb ederim deyü vekîl-i mezbûr Hafız Hüseyin Efendi’nin inkârına mukārin eylediği da‘vâsında karye-i merkūm ahâlîsinin isimleri ve babaları ve dedeleri isimlerini ve her birinden ne mikdâr öşür aldığını zikr ü beyân ederek karye-i mezkûre ahâlîlerinin ihâle ve tevkîllerine muhtâc olmağla bu sûretde vech-i meşrûh üzere karye-i mezkûr ahâlîsinin tevkîl ve ihâlelerine da‘vâ-yı mezkûresi bu mertebe ise meşrû‘a ve iltifâta şâyân olmamağla mûcebince müdde‘î-i merkūm Feyzullah Ağa da‘vâ-yı mezkûresiyle müvekkil-i mûmâ-ileyh İbrahim Bey’e bî-vech mu‘ârazadan men‘ olunduğu huzûr-ı [âlîlerine i‘lâm olundu]. Fî 22 S sene [12]57.