Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 290 Hüküm no: 298 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makrihora köyünden Yanko v. Dimitri ile Nikola v. İstavri’nin müşterek oldukları evi Mehmed Usta’ya satmaları Mübâya‘a-i menzil Havâss-ı Refî‘a kazâsına tâbi‘ Makrihora karyesi mütemekkinlerinden Yanko v. Dimitri ve Nikola v. İstavri nâm zimmîler meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Usta b. Ahmed nâm kimesne tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan sulbî kebîr oğlu Bostânî Osman Ağa nâm kimesne mahzarında herbiri ikrâr ve takrîr-i kelâm edip akd-i âti’z-zikrin sudûruna değin bi’l-münâsafa bâ-hüccet-i şer‘iye şirâen yedimizde mülk ve hakkımız olup karye-i mezbûrede vâki‘ bir tarafdan Dimitri zimmî mülkü ve bir tarafdan Hıristo zimmînin bakkāl dükkânı ve iki tarafdan tarîk-i âm ile mahdûd fevkānî üç bâb oda ve tahtında bir ahur ve bir bâb bakkāl ve bir bâb kasab dükkânı ve bir sokak kapısı ve merkūm Hıristo zimmî cânibinden gayrı etrâf-ı selâseden taş duvarı müştemil bir bâb mülk menzilimizi cümle-i tevâbi‘ ve levâhıkla tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mezbûr Mehmed Usta’ya iki yüz altmış guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz altmış guruşu müvekkil-i mezbûr Mehmed Usta yedinden bi’l-münâsafa tamamen ahz ü kabz eyledik, ba‘de’l-yevm menzil-i mahdûd-ı mezkûr cemî‘ müştemilâtıyla müvekkil-i mezbûr Mehmed Usta’nın mülk-i müşterâsı ve hakk-ı sarfı olup bizim kat‘a alâka ve medhalimiz kalmamışdır dediklerinde gıbbe’t-tasdîki’ş-şer‘î mâ-vaka‘a bi’t-taleb. Fî 22 min-Ra sene 1197 Şühûdü’l-hâl: Es-Seyyid Mehmed Efendi İmâm-ı karye-i mezbûre, Molla Ali b. Halil, Salih b. Halil, Sâbık Barutçubaşı Musa Ağa, Taşçılar Kethudâsı Salih, es-Seyyid Mustafa Kahveci.